Naatsiiat kilomut 60 kroner

Illoqqortoormiuni nutaanik naatsiiaarsiniat uisaallattapput. Taakkumi kilomut 60 kroneqartarput. Atuisulli ilaat taamarujuk akiliillutik naatsiiartorusuttarput.

Inuit Ataqatigiit sinnerlugit Inatsisartuni ilaasortaq Juliane Henningsen pissutsinik uparuaasuuvoq taanna isumaqarami taamatut akilersuineq nunatsinni equngasumik inissisimalersitsisoq. Pilersuisulli maluginiarpaa Pilersuisup Illoqqortoormiuni sullissinissaanut isumaqatigiissut Juliane Henningsenip akuerseqataaffigisimagaa.

Pilersuisumut Illoqqortoormiunik nioqqutissanik pilersuinissaanut isumaqatigiissut 2012-mi Inatsisartut aningaasaqarnermut ataatsimiititaliaanni akuersissutigineqarpoq taamanikkullu Juliane Henningsen ataatsimiititaliami ilaasortaavoq.

Oktoberimili tikittut
- Nunaqarfinni nioqqutissat akii kiffartuussinissamik isumaqatigiissummi Namminersorlutik Oqartussallu isumaqatigiissutaasumik aallaaveqartumik aalajangersarneqartarput. Ittoqqortoormiut assersuutigissagaanni kiffartuussinermut isumaqatigiissut naapertorlugu taavani tuniniarneqartussaapput naatsiaat igalaaminermiittut qerisullu, taakkulu taavani pisiarineqarsinnaapput, Pilersuisumi attaveqarnermut pisortaq Sofia Geisler nalunaarpoq.

Taassuma uppernarsarpaa Illoqqortoormiuni naatsiiat timmisartukkut tikisitat kilomut 60 koruuninik akeqarsinnaasut.

- Ilumoorpoq Ittoqqortoormiuni Pilersuisumi pisiarineqarsinnaammata naatsiiat kilomut 60 koruunillit. Naatsiaat taakku akisuut Islandimiit timmisartukkut tikisitaapput, tikisinneqarlutillu pisisartut namminneq noqqaassuteqarnerisigut akiliinerisigullu, Sofia Geisler nassuiaavoq.

Naatsialli tamavissuarmik kilomut 60 koruuneqanngillat.

- Illoqqortoormiuni pisiniat aamma periarfissaqarput naatsiianik kilo-mut 19,95 kr.-nik akilinnik pisinissaminnut, taakkuli 1. oktober 2013-imi umiarsuarmut kingullermut tikisitaapput, Sofia Geisler oqarpoq.