Nuuk
Naamaartoqareersoq: - Naamaarutaasinnaasut isummannaarsigit
Naamaartunik naammattuuisoqareersorlu Nuummi Pitsaaliuinermik immikkoortortaqarfimmit naamaarutaasinnaasunut pigisaqartunut tamanut kaammattuugineqarpoq isumannaatsumik tamakkua inissinnissaat
Nuummi pitsaaliuinermik siunnersortit saaffigineqarsimapput inuusuttut naamaarutaasinnaasunik ajornanngitsumik pissarsereernermik kingorna naamaarsimanerinik.
- Suliffeqarfiit tamaasa kaammaattorpagut naamaarutaasinnaasunik pigisaqarunik, tamakkua isumannaatsuut inisseqqullugit, taama Nuummi pitsaaliuinermut siunnersorti Eva Kirkegaard Sermitsiaq.AG-mut oqarpoq.
Tamanna pivoq pitsaaliuinermik suliaqartut Nuummi meeqqat angerlarsimaffiisa ilaannit ilisimatinneqareersullu, inuusuttut naamaarsimasut poliinit angerlaanneqartarsimanerinik.
- Naamaarneq ulorianartorujussuuvoq, qarasarmi ilisimajunnaartinneqartarpoq uummatillu kassunnera eqqorneqartarluni, aammalu toqussutaasinnaalluni.
- Inuusuttumik naamaartumik naammattuuiguit, taava pisussaatitaavutit oqartussat tamatuminnga ilisimatissallugit, Nuummi pitsaaliuisut taama nalunaarput.