innuttaasunik ataatsimiititsineq
Naalakkersusuisut Sisimiuni innuttaasunik ataatsimiisitsisut
Sisimiuni innuttaasunik ataatsimiisitsinermi suliassat assigiinngitsut saqqummiunneqarput
Sisimiuni kulturikkut illorsuarmi Taseralimmi Naalakkersuisut innuttaasunik ataatsimiisitsipput sapaatiummat. Innuttaasunik ataatsimiisitsineq innuttaasunit soqutigineqarluarpoq.
Naalakkersuisut Suka K. Frederiksen, Múte Bourup Egede, Hans Enoksen aamma Aqqaluaq B. Egede ataatsimiisitsinermi peqataanngillat.
Naalakkersuisooqatigiit suliat 225-it suliarisatik saqqummiuppaat. Kangerlussuarmi mittarfik talittarfillu, ilinniarfinnik nuussuinerit, soorlu Savimminilerinermik Ilinniarfiup Nuummit Sisimiunut nuunneqarnissaa, ilaatigut eqqartorneqarput.
- Mittarfiliornissat qanoq aningaasalerneqassappat? Takornariat akileraartassappat? Sisimiuni Qeqqata Kommunianilu borgmesteriusimasoq Hermann Berthelsen ilaatigut apeqquteqarpoq.
Aningaasaliisoqarnissaanut tunngatillugu suliaq qaammatip tulliani naammassissasoq Kim Kielsen aamma Erik Jensen ilisimatitsipput.
Mittarfiliornissamut atatillugu entreprenørinik sooq ujaasilertoqareernersoq Juliane Enoksenimit apeqqutigineqarpoq.
Kalaallit Airports maleruaqqusat malillugit sulisoq Erik Jensen ilisimatitsivoq.
Naalakkersuisunut ilaasortat siunissamut pilersaarutit pillugit saqqummiussaqarput.
Doris J. Jensenip ilinniartitaanermut nutarterinerup 2020-mi atuutilertussaq ilaatigut saqqummiuppaa.
- Inuusuttut kalaallisuinnaq oqaasillit ilinniarfinnut isersinnaalernissaat anguniarneqarpoq, Doris J. Jensen oqarpoq.
Kommunit tamarmik Campuseqarfeqassasut ilisimatitsissutigaa, taamaattumik ilinniartut ineqarfigisartagassaannik amerlanerusunik sanaartortoqartariaqassaaq.
Isumaginninnermut tunngasunik sulineq Sara Olsvigimit saqqummiunneqarput.
Qeqqata Kommunianut attuumassuteqartut aamma eqqartorneqarput. Tassani Agathe Fontain oqarpoq Sisimiuni napparsimaviup allilerneqarnissaa sulissutigineqassasoq.
Pissassarfik aamma Tilioq ataasinngornermi ammaanersiorneqarnissaat Sara Olsvigimit nuannaarutigineqarpoq.
Sisimiunit Kangerlussuarmut aqqusinissaq pillugu Erik Jensenimit iserfigineqarpoq. Tassani apriilimi nalunaarusiap naammassinissaa utaqqimaarneqarpoq.
Kalaallit Nunaat tamaat sullinneqartoq Kim Kielsen naqissusiivoq. KNR-imut nutaamik illorsualiornissaq pinnagu Kangerlussuarmi Uummannami Qaanaamilu aningaasat atorneqassasut Erik Jensenip oqaatigaa.