Naalakkersuisuusimasoq qisuariaateqartoq: Tele-Post angivallaalerpoq

Attaveqaatinik atuinermi namminersortunngorsaanissamut periarfissanik misissuinerup Tele-Postimit unitsinneqarsimanera pillugu KNR marlunngormat allappoq. Taamatut aalajangertoqarnera Inatsisartuni ilaasortamit Atassummeersumit Steen Lyngemit isornartorsiorneqarpoq.

- Misissuinerup unitsinneqarneranut tunngavilersuutigineqartoq ilumoorsinnaanngilaq. Misissuinermi imaaliallaannarlugu unitsinneqarpoq, Atassummit Steen Lynge oqarpoq.

- Tele-Post ukiut tamaasa millionerpassuarnik sinneqartoortarpoq, misissuisunullu imaattunut akissaqarluartussaavoq, oqarpoq.

Pitsaanerpaaq anguniarneqassasoq
Steen Lynge parteeqatiminut Knud Kristiansenimut attaveqarnermut naalakkersuisuusumut paragraf 37 naapertorlugu apeqquteqaasiorniarluni piareersaleruttorpoq.

- Aningaasartuutit amerlavallaarneri pissutaallutik misissuisimanerup unitsinneqarsimaneranik tunngavilersuuteqartoqarnera upperiuminaatsippara. Tele-Post inuiaqatigiinnut pitsaanerpaamik siunnertaqarluni sullissisussaavoq, Inatsisartuni ilaasortaq oqarpoq. Namminersorlutik Oqartussat suliffeqarfiutaat aamma angivallaalersimasut akisuallaalersimasullu oqaatigaa.

Siunnersuut
- Namminersortunngorsaanerit imaaliallaannaq Nunatsinni aaqqissuunneqarsinnaanngillat. Naalakkersuisuugallaravit sooq unammilleqatigiittoqarnerulernissaa angunianngiliuk?

- (Uninngagallarneq) Kabelinut anteninullu tunngasunut unammilleqatigiittoqarsinnaanera paatsoorneqarnikuuvoq. Taakku unammilleqatigiiffiussanngitsut isumaqarpunga. Kiffartuussinernut atatillugu unammilleqatigiittoqalernissaa anguniarpara, tassani Tele-Post toqqammaviliisussaavoq. Unammilleqatigiinneq pitsaasuuvoq avammullu aamma ammanerulersitsisarluni. Suliffeqarfiup ataasiinnaap ingerlatsisarneri pitsaasuunngillat.

Attaveqaatitigut unammilleqatigiittoqalernissaa Naalakkersuisunit 2006-mi aalajangiunneqartoq suli iliuuseqarfigineqanngilaq.