Friday, October 27, 2017 - 13:44

Naalakkersuisut ukioq ataasinngortorsiorput - qanoq isumaqarpit?

Naalakkersuisut maanna ilusertik atorlugu ukioq ataasinngortorsiorput. Sermitsiaq.AG-p Nuummi innuttaasut tallimat naalakkersuisoqatigiit sulinerat pillugu naapitani oqaloqatigai.

Kim Kielsenip, Sara Olsvigip aamma Hans Enoksenip naalaakkersuisoqatigiit isumaqatigiissutaat atsiorlugu Naalakkersuisut pilersimmatigit ukioq ataaseqqissaaq qaangiuppoq.

Suleqatigiit nutaat
Demokraatit aamma Atassut Naalakkersuisunit peerneqarput, Inuit Ataqatigiit aamma Partii Naleraq Siumup suleqatigileneranik tamanna kinguneqarpoq.

Kisianni maanna naalakkersuisoqatigiit innuttaasut qanoq isumaqarfigaat? Sermitsiaq.AG Nuummi illoqarfiup qeqqani inuit naapitani aperai.

Naalakkersuisunik naliliinerat assit ataanni uani atuakkit:

Henriette Kleinschmidt: - Sulinerat nalileruminaatsippara. Kisianni maanna partiit naalakkersuisoqatigiit nuannarinngilakka, anguniagaata pingaartitannut naleqqutinngimmata.
Assi.: Leiff Josefsen
Lars-Salik H. Kielsen: - Naalakkersuisoqatigiit sulinerat naammagisimaarpara, angusaallu ataatsimut isigalugu naammagisimaarpakka. Kisianni immikkoortut ilaanni isumaqatiginngilakka, soorlu maanna Naalakkersuisut aalajangiinerminni isumaqatigiinnerusinnaapput, partiillu illuatungiliuttut qaninnerusumik suleqatigineqartariaqarput.
Assi.: Leiff Josefsen
Aqqalu Jonathansen: - Sulinerat naammagisimaarnarpoq. Kisianni inissianik amerlanerusunik sanaartortitsinermik naammattumik suliaqanngillat. Inissianik attartortakkanik annertuumik amigaateqartoqarpoq, angerlarsimaffeqanngitsut amerlasuut takussaapput. Inissianik sanaartorniaritsi.
Assi.: Leiff Josefsen
Peter Petersen: - Partiit naalakkersuisoqatigiit pilersaarutaat pillugit paasissutissat amigaatigaakka. Assersuutigalugu namminiilivinnissamut apeqqummut tunngatillugu Naalakkersuisut nipaappallaarput, aamma innuttaasunik ataatsimiititsinerit amerlanerusariaqarput, Peter Petersen oqarpoq.
Assi.: Leiff Josefsen
Jakobine Høyer: - Ajortumik ingerlasoqarpoq. Qaammatini kingullerni ilaasortat partiitit qimallugit partiinut nuussorput, allallu partiiliornissamik pilersaaruteqarlutik. Politikerit sunersut paatsuunganarpoq, taamaammat politikkimut malinnaarusukkunnaarpunga.
Assi.: Leiff Josefsen
Seneste nyheder / Nutaarsiassat kingulliit