Naalakkersuisut tuluit oqaasii takornartat oqaasiini salliunniarpaat

Meeqqat atuarfianni tuluttoorneq siunissami annerusumik skemami ullumikkornit pingaarnerulissaaq. Illunillu qallunaatoorneq kingulliunneqalissaaq.

Atuaruk: Naajap pisortat atuarfiutaat taamaatiinnarpaa

Inatsisissat
Naalakkersuisut aamma inatsisissanik meeqqat atuarfianni allannguuteqartussanik Inatsisartut ukiakkut 2017-imi ataatsimiinneranni saqqummiussiniarlutik pilersaaruteqarput.

Tassani siunertat ilagissavaat, tuluttoornerup salliutinneqarnissaa, taamaalilluni meeqqat atuarfiani atuartunut fagi takornartat oqaasiini salliutinneqalissalluni, qallunaatoornerlu oqaatsini takornartani aappaattut inissinneqassapput. Ullumikkut tamanna killormoorpoq.

Atuaruk: Inuusuttut meeqqat atuarfianit anereerlutik unittoortartut amerlavallaaqaat

Nunarsuaq siuariartortoq
- Naalakkersuisut tunngaviusumik isumagaat inuiaqatigiittut nunarsuarmioqataasutut ineriartornikkut nunarput inissisimalluarnerussasoq innuttaasut ilinniarsimassusaat qaffassarsinnaagutsigu minnerunngitsumillu atuartut oqaatsitigut piginnaasaat qaffassarnerisigut meeqqat atuarfianni nunarsuarmioqatigiit oqaasiannik salliutitsinikkut oqaatsit atuartitsissutaasut aapperneqarneratigut, Ilinniartitaanermut, Kultureqarnermut, Ilisimatusarnermut Ilageeqarnermullu naalakkersuisoq, Nivi Olsen (D), Siumumit Inatsisartunut ilaasortamut, Vivian Motzfeldtimut akissuteqarnermini oqariartuuteqarpoq.

Taassuma oqallissaarut saqqummiuppaa. Tamannalu Inatsisartuni sisamanngornermi tallimanngornermilu oqaluuserineqassaaq.

Naalakkersuisunut ilaasortap saniatigut naqissuserpaa, aalajangiinissamut tunngasumik unammillernartoqartoq.

Atuaruk: Ilinniarfissuaq angusinngitsoorpoq

Allannguutissanik piumasaqartoq
- Ilisimassavarpulli tuluit oqaasiisa meeqqat atuarfianni allamiut oqaasiisut siullinngortinneri atuarfeqarfitsinnut allannguutinik annertuunik malitseqartariaqassasoq soorlu aamma taamatut ikaarsaariarnermi atuartut arlallit danskit oqaasiinik ilitsoqqussaralugu 1. klassimiilli atuartinneqarnissamut pisariaqartitsilissasut, Nivi Olsen oqarpoq.

Ilinniartitsisunik amigaateqartut
- Siusinnerusukkut misilittakkat takutittareerpaat tuluit oqaasiinik atuartitsinermik pingaartitsinerulerneq siuartitsinerlu immini atuartunut tuluttut oqallorinnerulersitsinanilu angusarissaarnerulersitsissanngitsoq. Ilinniartitsisunik allamiut oqaasiinik pitsaasumik atuartitsinissamut piginnaasalinnik amigaateqareerpugut, naalakkersuisoq ilanngullugu oqarpoq, aammalu tikkuarpaa, ilinniartitsisut piukkunnarsarnissaannut kiisalu ilinniartitsissutissanut nutaanut aningaasaliisoqarnissaanik pisariaqartitsisoqartoq.