mittarfiit

Naalakkersuisut: Tasiilami mittarfiliortoqassaaq

Attaveqatigiinnermut Naalakkersuisoq, Erik Jensenip (S), Tasiilami mittarfiliornissaq taamaatissimannginnerarpaa

Tasiilami mittarfiliortoqassasoq, Naalakkersuisut oqaatigaa - kisianni maannaanngitsoq.

Tasiilami mittarfiliortitsisoqassaaq. Attaveqaqatigiinnermut Naalakkersuisoq, Erik Jensen, tusagassiuutinut nalunaarummi oqarpoq.

Pilersaarut unitsinneqarsimasoq tamaani allaaserineqarsimangavoq.

Aamma atuaruk: Tasiilami mittarfiliortoqanngikkallassaaq

Taamaattoqangilaq, kisianni piffissaq sivisussaaq, Erik Jensen (S) oqarpoq.

- Naalakkersuisut Tasiilami mittarfiliornissaq taamaatinngilaat. Akerlianik Naalakkersuisut Tasiilami mittarfiliornissaq siuarsarusuppaat. Naalakkersuisut isumaqanngillat suliniut taanna Kalaallit Airports A/S-ip ataanut inissinneqarpat Tasiilami mittarfiliornissaq siuarsarneqassasoq, Erik Jensen (S) oqarpoq.

Justus Hansenip siunnersuuteqartuuvoq, Tasiilami mittarfiliornissaq Kalaallit Airportsip suliassarilissangaa, soorlu Ilulissani, Nuummi Qaqortumilu suliassarereeraat.

Siunnersuulli taanna Naalakkersuisut akerlerivaat, Tasiilamummi pilersaarutit suli piareersimaffigineqannginnamik.

- Tassalu 2017-imi qaammatit pingasut siulliit ingerlanerini mittarfiit tamarmik Kalaallit Airports A/S-ip ataani sanaartorneqarnissaannut pilersaarusiorneqarput. Tasiilami Ittoqqortoormiinilu misissueqqaarnerit siuariaateqarsimagaluartut pilersaarusiornerit suli aallartinneqanngillat, Erik Jensen (S) siunnersuummut, ullumi suliarineqartussamut, akissuteqarluni allappoq,

Nuummi, Ilulissani Qaqortumilu misissueqqaartoqarniartoq

Ukiarmi suliniutit pingasut Kalaallit Airportsip ataaniittut pillugit pisoqangaatsiarsimavoq. Tassani misissueqqaarnerit pisariaqartinneqartut ingerlanneqarsimallutik.

Aamma atuaruk: Justus Hansen mittarfiliortitsinissamik aalajangerneq pillugu: Inuit takorluugaannik tamaagaannartitsivoq

Misissuinerillu taakku, Tasiilami suli aallartinneqarsimanngillat.

- Kommuninut, Nunaqarfinnut, Isorliunerusunut, Attaveqaqatigiinnermut Ineqarnermullu Naalakkersuisoqarfik Tasiilami Mittarfiup pilersinnissaanut misissueqqaarnerit ingerlatileruttorpai. Mittarfiup sumut inissinnissaanut siunnersuutit suliarineqaleruttorput. Inissiinissaq akuerineqarpat pilersaarusiorneq inaarutaasoq pisinnaalissaaq, Erik Jensen (S) nalunaarueqarpoq.

Suliniut piareerpat aningaasaliineq aatsaa pissaaq

Mittarfimmik sumut inissiinissaq pilersaarusiornerlu piareerneqarpata aatsaat, kingorna suliniutip qanoq akeqarsinnaaneranut missingersuusiorneq suliarineqassaaq.

- Taamaammat Tasiilami mittarfiliornissap Kalaallit Airports A/S-ip ataanut inissinneqannginnissaa ima isumaqartinneqarsinnaanngilaq Tasiilami mittarfiliornissaq Naalakkersuisunit siuarsarumaneqanngitsoq, Erik Jensen (S) oqarpoq.

Tasiilami mittarfiliornissaq aallaqqaammulli sooq Kalaallit Kalaallit Airportsip ataanut inissinneqarsimannginnera, nassuiaaserneqarsimanngilaq.

Powered by Labrador CMS