maligassiusut
Naalakkersuisut tamarmik hashimut misissortinnermi angusipput
Naalakkersuisunut ilaasortat tamarmik qulingiluaasut quuminnik misissugassamik tunniusinikuupput, taakku takutippaat tamarmik hashimik pujortarsimanngitsut
Naalakkersuisunut ilaasortat qulingiluat tamarmik naatsorsuutigineqareersutut hashitorsimanermut misissortinnerat ajunngitsumik inerneqarpoq.
Naalakkersuisut hashi akiorniarlugu nuna tamakkerlugu iliuusissamut atatillugu piumassutsiminnik misissortipput.
Atuaruk: Naalakkersuisut hashimut misissortinnissaminnut piareersimasut
Akuersaanngilluinnartut
Naalakkersuisut hashimut akuersaanngilluinnarnerat aamma taamalillutik maligassiusutut saqqumernissaat, misissuinerup siunertaraa.
Peqqissutsimut naalakkersuisoq, Doris Jakobsen (S), naalakkersuisoqatigiinnermut isumaqatigiissummut atatillugu Naalakkersuisut misissorneqarnissaannut aaqqissuussisuuvoq.
Iliuusissatut pilersaarut
- Hashi akiorniarlugu nuna tamakkerlugu iliuusissatut pilersaarusiornitsigut hashimik atornerluinerup ajornartorsiutaanera ukkatarineqalerpoq Naalakkersuisullu suliassaqarfii akimorlugit suliniutit arlaqartut aallartisarneqarlutik. Inuusuttortatta atornerluilinnginnissaannut suliniarneq inuiaqatigiinni akisussaaqataaffigaarput, tusagassiuutinut nalunaarummi oqarpoq.
Hashimik atuisimanerup kingorna qanoq sivisutigisumik quumi ersiuteqartarnera assigiinneq ajorput. Ataasiarlunili atuisimagaanni sapaatip akunnerata missaa ersiuteqartarpoq, akuttunngitsumilli atuisuugaanni sapaatit akunneri arfinillit tikillugit ersiuteqartarluni.