misissuineq
Naalakkersuisut sukaterinerat Kukkunersiuinermut Ataatsimiititaliamit nersualaarneqarput
Kaajallaasitamut missingiutip nutaap Naalakkersuisut aningaasat atortagaannut, soorlu ilassinninnernut, nerisaqarnernut, tunissutinut, angalanernut, unnuinermut aningaasartuutinut namminernullu angalanernut killiliisussatut siunnerfigineqartoq, Inatsisartut Kukkunersiuinermut Ataatsimiititaliaannit nuannaarutigineqarpoq
Namminersorlutik Oqartussat Naalakkersuisunut aningaasartuutigisartagaat pitsaanerusumik aqunneqalernissaannik sukaterisoqarpoq. Naalakkersuisunut ilaasortaasut akileraartartut aningaasaataannik atornerluinnginnissaat anguniarneqarluni.
Kaajallaasimut missingiut nutaaq atuutingajalersoq nittartakkami allaaserineqartareerpoq pingasunngornermi.
'Naalakkersuisunut ilaasortanut aningaasartuuteqartarneq il. il. pillugu kaajallaasitaq' Naalakkersuisunut ilaasortanut aningaasartuutigineqartartunut, soorlu ilassinninnernut, nerisaqarnernut, tunissutinut, angalanernut, unnuinermut aningaasartuutinut namminernullu angalanernut killiliisussatut siunnerfigineqartoq Naalakkersuisut siulittaasuata oqaatigaa.
Kaajallaassitaq Naalakkersuisunut ilaasortat aamma Namminersorlutik Oqartussat siunissami nutaanik akuerisaanngitsumik akiligassaqartoqalernissaa pinngitsoornissaanut Naalakkersuisut siunissami qanoq iliuuseqartarnersut assersuutaassasoq Kim Kielsenip oqaatigaa.
Nersualaarineq
Sukaterisoqarnissaanut suliniuteqartoqarnera Inatsisartut Kukkunersiuinermut Ataatsimiititaliaannit nersualaarneqarpoq. Deloittep misissuinerminut atatillugu kaajallaasitap nutarterneqarnissaa Naalakkersuisunut siunnersuutaat atuutilersinneqarnissaa Ataatsimiititaliamit naatsorsuutigineqarpoq.
Suliffeqarfik kukkunersiuisut Deloitte, 2009-mit 2014-mut Naalakkersuisuni ilaasortat misissuisimanerat pillugu Inatsisartunut ilaasortanut ilisimatitsissuteqarluni Kukkunersiuinermut Ataatsimiititaliami siulittaasoq Demokraatinit Randi Vestergaard Evaldsen allappoq.