Pituffik

Naalakkersuisut siulittaasuata oqaaseqannginnera IA-mit tupigusuutigineqarpoq

Pituffik pillugu Naalakkersuisut siulittaasuata inuussutissarsiornermut, suliffeqarnermut, niuernermut nunanullu allanut naalakkersuisup apersorneqarumannginnerat Inuit Ataqatigiinnit tupigusuutigineqarpoq

Amerikarmiut illersornissamut suliffeqarfiata Vectrusip suliffeqarfiutaata Exelis Servicesip Pituffimmi kiffartuussinissamut isumaqatigiissuteqarfigineqarsimanera pissutigalugu danskit aamma kalaallit naalakkersuisui isornartorsiorneqaqattaarput.

Taamaakkaluartoq Naalakkersuisut tamanna pillugu apersorneqarumanngillat sapaatip akunnerani matumani.

Pituffik pillugu suliami inuussutissarsiornermut, suliffeqarnermut, niuernermut nunanullu allanut naalakkersuisoq Vittus Qujaukitsup Siumumeersup oqaaseqartinneqartarnissaa Naalakkersuisut siulittaasuanit Kim Kielsenimit aamma Siumumeersumit aalajangerneqarpoq.

Qujaukitsup Washington D.C-mi USA-mi illersornissakkut ministeriaqarfiani nunanullu allanut ministeriaqarfiani ataatsimeeqateqarsimanera pillugu suut anguneqarsimanersut suli ilisimaneqanngilaq. Tassami taanna pillugu Vittus Qujaukitsoq apersorneqarusunngilaq.

Danskit nunanut allanut ministeriat Martin Lidegaard, Radikale Venstre, danskit tusagassiorfiinut USA-miissimanini nassuiaassutigisareerpaa.

IA: Akisussaasut nassuiaasariaqarput
- Inuit Ataqatigiinni siulittaasoq Sara Olsvig, Pituffimmi kiffartuussinissamut isumaqatigiissummut kikkut akisussaasuunersut Naalakkersuisuni toqaatigiumaneqannginnera qanoq oqaaseqarfigisinnaaviuk?

- Danskit nunanut allanut ministeriata Folketingimi isumasiorneqarnissaminut peqataarusunnginnera tupigusuutigaarput. Aamma Naalakkersuisut suliamut oqaaseqarusunnginnerat tupigusuutigaarput. Maannakkut oqaluuserineqartut unitsinniarlugit Naalakkersuisut oqaaseqartariaqarput kikkut akisussaasuunersut.

- Naalakkersuisut akisussaaqataappat?

- Maannakkumut suliaq isikkoqartillugu Naalakkersuisut akisussaaqataapput. Ingerlariaqqittoqassappat susoqarpiarsimanersoq oqaatigineqartariaqarpoq. Sumulluunnit attuumassuteqanngitsut misissuinissaat piumasaraarput. Kalaallit Nunaata kukkussutai siunissami kukkussutigineqaqqinnginnissaat tassani paasineqassaaq. Eqqartuussissuserisut misissuinissaat Naalakkersuisunit toqqarneqartut sumulluunniit attuumassuteqanngitsuusoq isumaqarpugut, Inuit Ataqatigiinni siulittaasoq Sermitsiaq.AG-mut oqarpoq.

Paasissutissiisoqarnissaa naatsorsuutigaa
- Vittus Qujaukitsup USA-miissimanerminut paasissutisseerusunnginnera Inuit Ataqatigiinnit qanoq oqaaseqarfigisinnaavisiuk?

- Nunanut allanut tunngasunut naalakkersuisup USA-mut angalasimanerminut angusarisimasani Inatsisartuni nunanut allanut sillimaniarnermullu ataatsimiititaliaanut angusani nassuiaatigissagai naatsorsuutigaara ullumi tallimanngornermi.

Sara Olsvig Naalakkersuisunut isornartunik paragraf 37 naapertorlugu arfineq pingasunik apeqquteqaqqammerpoq arfineq pingasunik.

Powered by Labrador CMS