KANUKOKA
Naalakkersuisut Sermersuumut isumaat allannguuteqanngilaq
Naalakkersuisut Kommuneqarfik Sermersuumik isumaqatiginninniartannginnissaq aalajangiusimagaat Naalakkersuisunut siulittaasoq Kim Kielsen ilisimatitsivoq. Ilisimaneqareersutummi Kommuneqarfik Sermersooq Kanukokamit ilaasortaajunnaassaaq
Naalakkersuisut siulittaasuat Kim Kielsen Siumumeersoq tunniutiinnarumanngilaq.
Tassami Kommuneqarfik Sermersuumi borgmesteri Asii Chemnitz Narup Nuuk TV-mut oqarpoq, Kommuneqarfik Sermersuup Kanukoka-mit aninissaanut ilutigitillugu Naalakkersuisut kommunemut ilisimatitsisimasut Namminersorlutik Oqartussat pingasuulluni isumaqatigiinniartoqarnissaanik pilersaaruteqanngitsut. Ilisimaneqareerpormi Kommuneqarfik Sermersooq Kanukoka-mit ilaasortaajunnaassasoq januaarip aallaqqaataani 2016-mi.
- Suliaq tamanna borgmesterilu oqaloqatigiissutigaarput (marlunngornermi). Ilisimatitsissutigaara nuna tamakkerlugu suliassanut tunngatillugu Naalakkersuisut Kommuneqarfik Sermersuumik isumaqatiginninniartannginnissaq aalajangiusimagakku, Naalakkersuisut siulittaasuat Kim Kielsen tusagassiuutinut nalunaarummi oqarpoq.
Kanukokap nukittuujunissaa
- Kommunit nukittuumik peqatigiiffeqartariaqarput isumaqatigiinniarnerni peqataasinnaasumik, taamaalilluta suliassarpassuit erloqinartut ataatsimoorluta aaqqiissuteqarfigisinnaassallutigit. Aamma ilisimatitsissutigaara tatigeqatigiilluta oqaloqatigiissinnaasariaqartugut.
- Kommunit suleqatigiinnermikkut angusaqarnerusinnaasut avataaniikkaanilu angusaqarnannginnerusoq isumaqarpunga. Nutaamik isumaqatiginninniariaaseqalissagaluaruttakommunit immikkuutitaarlutik Namminersorlutik Oqartussanik isumaqatiginninniartarlutik, kommunit ullumikkornit sunniutikinnerulissapput, Naalakkersuisut siulittaasuat tusagassiuutinut nalunaarummi Tusagassiivimmeersumit oqarpoq.