puiaasat utertittakkat
Naalakkersuisut: Puiaasat utertittakkat pillugit aalajangiisoqanngilaq
Maanna puiaasanik utertitseriaaseq allanngorneqassanersoq imaluunniit ingerlaannassanersoq suli qularnarpoq, Namminiilivinnermut, Pinngortitamut, Avatangiisinut Nunalerinermullu Naalakkersuisoq Suka K. Frederiksen naqissusiivoq
Puisaanik utertisarneq annerusumi naalakkersuisup misissuleruttorpaa, tamannalu allannguuteqartoqarumaarnersoq tunngaviliisuussaaq.
- Avatangiisit eqqarsaatigalugit utertitseriaaseq maanna atorneqartoq Kalaallit Nunaata kitaani ingerlalluartorujussuuvoq, utertinneqartartut 98 procentit sinnerlugit amerlassuseqartarlutik. Puiaasanik utertitsisarneq Kalaallit Nunaata avannaani Tunumilu atorneqanngilaq, tusagassiuutinut nalunaarummi allaqqavoq.
Suka K. Frederiksen oqarpoq:
- Sulinitsinni tamatigut peqqissaartumik sulinissarput, aammalu Naalakkersuisut nunatsinnut pingaarutilinnik aalajangiisussanngortillugit ilisimasanik nutaanerpaanik peqarnissarput pingaaruteqarpoq. Taamaattumik poortuutissanik suliassaqarfimmi misissuinissarput, taamaalillutalu utertitseriaatsip maanna atorneqartup qanoq ingerlaneranik, kiisalu utertitseriaatsimik naleqqussakkamik nutaamilluunniit atuutsitsilernissamut periarfissat suunerinik paasisaqarnissarput pisariaqarluinnarpoq.
Suka K. Frederiksenip ilisimatitsissutigaa, ''soorunami Grønlandskonsortietip Nuuk Imiup 2018-ip naanerani matuneqarnissaanik innersuussuteqarnera eqqumaffigaara''.
- Kisiannili Nuuk Imeq A/S aktianik piginneqatigiiffittut namminersortutut atortunut aningaasaliissanerluni aammalu suliaminik ingerlatseqqissanerluni nammineerluni aalajangiisussaavoq, naalakkersuisoq oqarpoq.