Qeqertarsuatsiaat ullumi
Naalakkersuisut pissaanilittaat marluk Targamik angalapput
Kim Kielsen Karl-Kristian Kruselu ullumi marluinnaallutik Qeqertarsuatsiaaliarput innuttaasunik ataatsimiititsiartorlutik
Nuup kujataani Qeqertarsuatsiaani allanngornerujussuaqartussaavoq.
Ilanngullugulu ulapilluni aalisarfiup naligaa.
Taakkua marluk pissutaagunarput Naalakkersuisut siulittaasuata Kim Kielsenip aamma aalisarnermut, piniarnermut nunalerinermullu naalakkersuisup Karl-Kristian Krusep ullaaq innuttaasunik ataatsimiititsiartorlutik nunaqarfimmut aallarnerannut.
Aalisakkat rubinillu
´Innuttaasunik ataatsimiititsinermi pingaarnertut sammineqassapput aalisarneq, piniarneq taqqavanilu aalisakkanik tunisassiorneq, kiisalu True North Gemsip rubininik suliniutaa, tamaanilu aatsitassatigut periarfissaasinnaasut allat´, mailimi namminersorlutik oqartussat Sermitsiaq.AG-mut nassiussaanni allassimavoq.
Rubininik piiaaffik erniinnaq ammassaaq - immaqa aasaq manna aallartereersinnaalluni. Taamaattumik Sermitsiaq.AG innuttaasunik ataatsimiititsinermi peqataarusukkaluarpoq. Nutaarsiassaqartitsivik qaaqquneqarsimanngilaq, ippassarlu peqataasinnaanerluta aperigatta itigartinneqarpugut.
Ullaaq Nuummit aallarput
Ullaaq angalaqatigiit makkua Nuummit Targa 31-mik aallarput:
Naalakkersuisut siulittaasuat Kim Kielsen naalakkersuisoqarfianilu pisortaq Søren Hald Møller, aalisarnermut, piniarnermut nunalerinermullu naalakkersuisoq Karl-Kristian Kruse, naalakkersuisoqarfimmini atorfilittani marluk ilagalugit, ministerip allattaa Kirsten Enequist siunnersuisuunerlu Tina Davidsen.
Unnugu Nuummut utereersimassasut naatsorsuutigineqarpoq.