isumasiuineq

Naalakkersuisut peqquserlunnermut iliuuseqarnissamut sumiginnaasut

Peqquserluttarneq akiorniarlugu Naalaakkersuisut iliuuseqanngippallaarput, Transparency International Greenlandip inuit isumaannik misissuinerani 63 procentit taama oqarput

Kalaallit Nunaat siullermeerluni Transparency Internationalip peqquserluttarnermut barometerianut ilaavoq. Innuttaasut amerlasuut peqquserluttarneq ajornartorsiutaasoq isumaqartut, barometerip takutippaa.

Transparency International Greenlandip Gallup innuttaasunik 510-usunik, peqquserluttarneq qanoq misigineraat apersuitissimavaa.

Naalakkersuisut iliuuseqanngippallaarput
Ingammik immikkoortumi ataatsimi Transparency aarlerisaaruteqarpoq.

Naalakersuisut peqquserluttarnermut iliuusaat sakkukippallaartut amerlanerussuteqartut isumaqarput. Akissuteqartut 25 procentii isumaqarput naalakkersuisut peqquserlunniartarneq akiorniarlugu sullarluppallaartut. 38 procentiusut isumaqarput akiuiniarneq pitsaanngitsumik ingerlanneqartoq.

Atuaruk: Inuit pisinnaatitaaffii pillugit najoqqutassiamik saqqummersitsisoq

Peqquserluttarneq ajornerulersimavoq
Aperineqartut affaasa missaasa peqquserluttarnerup ajornerulerneranik isumaqarnerat asuliinnaanngitsutut misiginarsinnaavoq. 11 procentit missaat isumaqarput peqquserluttarneq assut annertusisimasoq, 37 procentit isumaqartut annertusisimasoq/ajorteriarsimasoq.

Sanilliullugu 14 procentiinnaat isumaqarput peqquserlunniartarneq ukiumi kingullermi appasinnerulaarlersimasoq.

Nunarput ajunnginnerusut akornanni
Transparency Internationalip misissorsimasaani, nunani 42-usuni Nunarput katinnerani ajunnginnersut akornanniippoq. Peqquserlunneq nunap ajornartorsiutaanni annerpaasut ilaannut apeqqummut tunngatillugu, Kalaallit Nunaat nunani peqquserlunnginnerpaaffiusunit kisikkaanni 11-iuvoq.

Nunat soorlu Tuluit Nunaat, Tadjikistan aamma Georgien pitsaanerusumik inissisimapput, Tysklandimi aamma Sverigimi innuttaasut nunatik peqquserlunnerpaaffiunngitsutut isigaat. Danmarki misissuinermut ilaanngilaq.

Peqquserlunneq qanoq isumaqarfigineqarnersoq qularnartoq
Oqarasuaatikkut apersuinermi inuit namminneq peqquserlunnermik qanoq paasinninnerat atorneqarpoq. Tamanna Transparency Internationalip nunani tamani misissuiffigisaani assigiisinneqarpoq.

Kalaallit Nunaannili oqaatsimik eqqoqqissaartoqannginnera immikkut ittumik unammillernartoqarpoq. Kalaallisut apersuinermi 'ileqqorlunneq' atorneqarpoq, taanna nalinginnaasumik 'pitsaanngitsumik pissusilersornertut' isumaqartinneqarpoq. Taamatullu ataasiakkaat peqquserlunneq eqqartortillugu assigiinngitsumik isumaqarsinnaassapput.

Kalaallit Nunaanni peqquserlunnermut barometeri allaaserisap talerpiata tungaani linki atorlugu atuarsinnaavat

Powered by Labrador CMS