Naalakkersuisut peqqarniisaarniarneq akuerisinnaanngilaat

Naalakkersuisut peqqarniisaarniarneq, politiinik pingasunik ikiliillunilu inuup ataatsip inuuneranik naleqartoq akuerisinnaanngilaat.

Saassussineq pivoq Danmarkimi arfininngornermi ualikkut kulturikkut naapittarfimmi Krudttøndenimi, tassani ilaatigut najuuppoq svenskeq pruffiitimik Muuamaamik titartaasimasoq Lars Vilks.

- Taamannak peqqarniisaarniarneq Naalakkersuisut akuerisinnaanngilaat, eqqugaasullu ilaqutaasullumi eqqarsaatitsinniipput misiginneqatigaavullu.

Taama Naalakkersuisut siulittaasuat, Siumumeersoq Kim Kielsen, tusagassiuutinut nalunaaruteqarpoq.

Atuaruk: Politiit Østerbromi saassussineq peqqarniisaarnertut misissuiffigaat

Atuaruk: Østerbromi saassussisoqarnerani inuk ataaseq toquvoq

Danskit ministeriunerat Helle Thorning-Scmidt meddelelte Danmarkimi arfininngornermi unnukkut oqarpoq suut tamaasa atorlugit saassussisut nassaariniarneqassasut eqqartuussivimmullu sassartinneqarlutik.

- Naalakkersuisut neriuutigaat danskit oqartussaasuisa pisuusut nassaarilertussagaat eqqartuussivikkoortillugillu, Kim Kielsen oqarpoq.

Naalakkersuisut Siulitaasuata Københavnimi arfininngornermi pisumut kalaallit misiginneqataanerat tapersersuinerallu danskit naalakkersuisuinut piaarnerpaamik anngutissavai.

Københavnimi Politiit siusinnerusukkut nalunaarutigigaluarpaat killilersugaanngitsumik oqaaseqarsinnaaneq pillugu oqallittunut saassussisut marluk ujarneqartut, kisianni arfininngornermi unnukkut nalunaarutigineqarpoq immaqa ataasiinnaq saassussisimasoq.