Ilinniarneq
Naalakkersuisut nuussinissamut pilersaarutaat borgmesterip qiimmatsaatigai
Naalakkersuisut Saviminilerinermik Ilinniarfiup Sisimiunut nuunneqarnissaanut suliniummik aallartitsimmata eqqortumik aalajangiinerarlugit, Qeqqata Kommuniani borgmesterip Malik Berthelsenip nersualaarpai.
Saviminilerinermik Ilinniarfik Nuummiittoq Sisisimiunut nuunneqarpat iluaqutissarpassuaqarpoq.
Qeqqata Kommuniani borgmesteri, Malik Berthelsen (S), Naalakkersuisut nuussinissamut pilersaarutaannik nersualaarinnittoq taama isumaqarpoq.
- Sisimiuni KTI-mut / Tech Colle Greenland-imut atalersinneqarneratigut, assassortunngorniarluni ilinniartut, Aatsitassalerinermik Ilinniarfimmut, DTU-llu ataani Issittumi ingeniørinngorniarfimmi ilinniartitsisunut ilinniartunullu allanut attaveqarsinnaalernermikkut ilinniartunut atugassarititaasut pitsaanerulissapput, taanna tusagassiuutinut nalunaarummi oqarpoq.
Nuummi Saviminilerinermut Ilinniarfimmi ilinniartitsisut amerlasuut Sisimiunut nuunnissaat Malik Berthelsenip taamaammat neriuutigaa.
Atuaruk: Ilinniarfiit nuunneqarnissaannut pilersaarut nanginneqarpoq
- Sisimiuni sunngiffimmi periarfissarpassuatsialaat, Qeqqata Kommuniani meeqqerivinni akigititat appasinnerat, meeqqat atuarfiatalu ineriartortinneqartuarnera kiisalu nunap immikkoortortaani ineriartortitsinissamik suliniuterpaaluit orniginarsaatigalugit ilinniartitsisorpaaluit Sisimiunut nuukkumaassasut, taanna erseqqissaavoq.
Sisimiuni ilinniartitsisunut ilinniartunullu inissat pitsaasut qulakkeerniarlugit, Qeqqata Kommuniata Ilinniartitaanermut Naalakkersuisoqarfik qaminut suleqatigalugu aallartippoq.
- Soorunalimi aamma Sisimiut qiterpasissortaani ilinniartoqarfinnut atalersillugu, Saviminilerinermik Ilinniarfissap nutaassap ullutsinnut naleqquttumik pilersaarusiorneqarnissaa, Qeqqata Kommunia nalunaarpoq.