Naalakkersuisut nikittut: Lars Løkkep ministerit pingasut nutaat ilisaritippai
Søren Pind aamma Esben Lunde Larsen ministeritut tunuarput. Tamanna annikitsumik nikisitsinermik kinguneqarpoq.
Statsminister Lars Løkke Rasmussenip (V) pingasunngornermi ministerit nutaat pingasut dronningimut ilisaritippai.
Ilinniartitaanermut ilisimatusarnermullu ministerip Søren Pindip (V) aamma avatangiisinut inuussutissalerinermut ministerip Esben Lunde Larsenip (V) tunuarniarlutik aalajangernerannik nikisitsineq pissuteqarpoq. Taakku marluullutik marlunngornermi nalunaaruteqarput.
Venstrep naalakkersuinikkut oqaaseqartartua, Jakob Ellemann-Jensen (V), avatangiisinut inuussutissalerinermullu ministerip Esben Lunde Larsenip atorfia atorfigilerpaa.
Jakob Ellemann-Jensenip taamaammat kingusissukkut kalerriuteqarluni atuartut Christiansborgimi takornariartinnissaraluuat taamaatittariaqarsimavaa, taarsiullugu pingasunngornermi dronningimut ilisaritikkami.
Tommy Ahlers, danskit naalakkersuisuini Disruptionrådimi ilaasortaasoq, ilinniartitaanermut ilisimatusarnermullu Søren Pind paarlallugu ministerinngorpoq, taanna Det Kongelige Teaterimi pisortatut iluatsinnagu atorfininniarsarisimagaluarpoq.
Nikittoqarnerani tupaallannalaartumik Karen Ellemann ministeritut aamma tunuarpoq.
Aalisarnermut, nunat avannarliit suleqatigiinnerannut aamma naligiissitaanermut ministeriuffia Eva Kjer Hansenimit tiguneqarpoq, tamanna Statsministeriap tusagassiuutinut nalunaarutaani atuarneqarsinnaavoq.