Naalakkersuisut naveerserujussuartut
Kukkunersiuinermut ataatsimiititaliaq pissutsinik »aviisinut tapiissutit tunniunneqarsimasariaqaraluarnerannik« tikkuaavoq. Ataatsimiititaliap siunnersuutigaa Nutaarsiassaqartitsivik eqqartuussissuserisumik sulisitsissasoq - imaluunniit Ombudsmandip akulerunnissaa utaqqissagaa
Tusgassiuutitut tapiissutit arsaarinnissutigineqarsimasut pillugit Inatsisartut Kukkunersiuinermut Ataatsimiititaliaata Naalakkersuisut naveerujussuarpai sakkortuumillu assuarlerlugit.
Taamatut maluginiagassaasumik sakkortuumik isornartorsiuineq saqqummiunneqarpoq ataatsimiititaliap landskarsip naatsorsuutaasa aappassaaneernerannut isumaliutissiissutaani.
Tusagassiuutinut tunngasup quppernerni qulini sammineqarnerani Naalakkersuisut aammalu Siulittaasup Naalakkersuisoqarfiat malunnavissumik kukkussutaat ataatsimiititaliap maluginiarpai.
Tamatuma kingorna Kukkunersiuinermut Ataatsimiititaliaq imatut inerniliivoq:
– Siuliani takuneqarsinnaasutut pissutsit arlallit tikkuussilluinnarput Naalakkersuisut Nutaarsiassaqartitsivimmut Sermitsiaq.AG-mut aningaasanut inatsisikkut tapiissutit tunniussimasariaqaraluaraat.
Taamatut ersarissumik nalunaaruteqaraluarluni ataatsimiititaliap piumasarinianngilaa 2,5 millioner koruunit tunniunneqarnissaat - ataatsimiititaliap allanneratut - »tunngavissat pigineqartut pissutigalugit mattunneqarsinnaanngimmat Naalakkersuisut tapiissutinik tunniussinnginnissamik aalajangernerat malittarisassanik unioqqutitsinerunngitsoq«. Ilanngullugulu allassimavoq »imaasiallaannaq inerniliisoqarsinnaanngitsoq Naalakkersuisut aningaasanut inatsimmi aningaasaliissuteqarnermut tunngavissat unioqqutillugit iliuuseqarsimasut«.
Oqaluttuaq tamaat AG-mi sapaatip akunnerani saqqummersumi atuaruk, taannalu e-avisitut pisiniarfimmiluunniit pisiarisinnaavata.
Tassanissaaq Kukkunersiuinermut Ataatsimiititaliap tusagassiorfinnut tapiissutinik suliarinninnera atuarsinnaavat. Taanna qupperneq 7-mi aallartippoq.