Naalakkersuisut Narsami 'immikkut ittumik' suliniuteqartut

Narsami suliffissaaleqisorpassuaqartoq Naalakkersuisut eqqumaffigaat. Taamaattumik Naalakkersuisut Kommune Kujalleq suleqatigalugu suliniutit arlallit, kujataani illoqarfimmi innuttaasunik suliffissaaleqisunik ikinnerulersitsisussat, aallartippaat.

Suliniutit inuussutissarsiornermi aalisarnermilu suliassanut aalajangersimasunut sanaartornermik suliassanik siuartitsinermit aammalu suliffeqanngitsut akornanni pikkorissartitsinermik suliniutinut tunngapput.

- Naalakkersuisut Kommune Kujallermik suleqateqarnerat naammagisimaarpara aammalu ukioq qaangiuppat Narsami suliffissaaleqisut amerlassusaanni tamanna takusinnaassagipput naatsorsuutigilluinnarpara, Inuussutissarsiornermut, suliffeqarnermut, niuernermut nunanullu allanut naalakkersuisoq Siumumeersoq Vittus Qujaukitsoq tusagassiuutinut nalunaarummi Naalakkersuisut Narsami 'immikkut ittumik' suliniuteqarnerat pillugu oqarpoq.

50 million koruunit immikkoortinneqartut
Narsami illuutinik isaterinissamut, iluarsaassinissamut allilerinissamullu 50 millioner koruunit sinnerlugit Naalakkersuisut immikkoortitsisimanerat tassani aalajangersimasumik pineqarpoq.

Nunaqarfinni isorliunerusunilu Inuussutissarsiornermut Suliffissaqartitsiniarnermullu suliniuteqarnermit Kommune Kujalleq 2,5 millioner koruuninik pissarsitinneqarpoq, tassani suliassanut attuumassuteqartunut aningaasaliissutit ilai Narsamut eqqaanullu tutsinnissaannik kommuni periarfissaqarluni. Tassunga atatillugu inuussutissalerinermut festivaleqartitsinissaq, illoqarfiup siuariartortinneqarneranut suliffissaqartitsiniarnermullu iluaqutaasussaq kommunip nammineerluni siunnersuutigaa.

Aamma illoqarfimmi suliffissanik pilersitsisinnaanissamut, Narsami tunitsivimmut saarullittassiinissamik periarfissat Naalakkersuisut misissorpaat.

Suliffissaaleqisut katillugit 4.402-t suliffissaaleqisutut januarimi nalunaarsorneqarsimapput, taakkunannga 737-t nunaqarfinni. Tamanna 2014-mi taamaalinerani nalunaarsukkanut 552-inik ikileriarneruvoq.

Narsami suliffissaaleqisut 202-pput qaammammi kingullermi. Illoqarfik 1500-t missaannik innuttaasoqarpoq.