NunaMinerals
Naalakkersuisut naggatissaa tikillugu neriupput
Nunamineralsip atorunnaarneranik kinguneqarsinnaasumik ataatsimeersuarneq aallartilivissorlu, Naalakkersuisut nalunaaruteqarput Nunamineralsip ingerlaannarnissaata qulakkeerneqarnissaa neriuutigigitsik
Nunamineralsimi immikkut ataatsimeersuarneq Nuummi Hotel Hans Egedemi sisamanngornermi ualikkut sisamanut aallartippoq, ilaatigut ataatsimiinnermi oqaluuserineqartussaalluni piginneqatigiissutit naleerutsinneqarnissaat kiisalu Fondsbørsenimi Københavnimiittumi nalunaarsorsimajunnaarnissaa.
Siulersuisut akisussaaffimmik tigusinissaat neriuutigaat
Naalakkersuisut, marlunngornermi avammut nalunaaruteqarput Nunamineralsimut aningaasaliissutit tamarmik - allanit aningaasaliisoqaqqinnianngippat - annaaneqareersut, maannalu Nunamineralsip ataatsimeersuarnerata aallartinngitsiarnerani tusagassiuutinut nalunaaruteqarlutik allapput neriuutigigitsik Nunamineralsimi siulersuisut akisussaaffimmik tigusillutik suliffeqarfiup ingerlaannarnissaa qulakkeerumaaraat.
Atuaruk: Kielsen Nunaminerals pillugu: Pilersaarut ingerlariaqqinnissamut pilersaarutaanngilaq
Atuaruk: Naalakkersuisut: Nunamineralsimut aningaasaliissutigineqarsimasut tamarmik annaaneqareerput
- Naalakkersuisut piginneqataasutut Nunamineralsimut kingullertigut taarsigassiisimapput. Selskabip piffissami tulliuttumi ingerlaannarsinnaanissaa qulakkeerniarlugu Naalakkersuisut 4,5 millioner koruuninik novembarip 27-anni 2014 taarsigassarsititsiniarlutik kingullermik aalajangerput. Taarsigassiititsinermi piumasaqaatigineqarpoq selskabip ingerlariaqqinnissaanut nutaamik piviusorsiortumik pilersaarusioqqissaassasoq, Naalakkersuisut siulittaasuat, Siumumeersoq Kim Kielsen, tusagassiuutinut nalunaarummi sisamanngornermi ualikkut nalunaaqutaq sisamanngulersoq nassiunneqartumi taama oqarpoq.
Atuaruk: Akuersissut tunniunneqarpoq suliffeqarfiup matuneqarnissaa aarlerineqarmat
Atuaruk: Nunamineralsip aatsitassarsiornermut akuersissutaatini tunniukkaa
Kielsen: Siulersuisut maanna aalajangiisussanngorput
Kim Kielsenip nassuiaaneratut tassa Naalakkersuisut piginneqataasuni kisiartaallutik annaassiniarlutik pilersaarusiorsimapput.
- Selskabip siunissaa qulakkeerniarlugu Nunaminerals pilersaarummik saqqummiisinnaasimanngilaq. Tamanna ajornarsimarpasippoq, naak qaammatini marlunni periarfissaqarsimagaluarlutik aamma taarsigassarsititsinermut atatillugu pilersaarusiornissamut piumasaqaateqaraluartoq, Kim Kielsen allappoq, imalu nangilluni:
Naalakkersuisut akisussaaffimmik tigusivoq – arlaleriarluni. Nunamineralsip siunissami ingerlaannarnissaanut siulersuisut piginneqataasullu allat akisussaaffimmik tigusinissaat tullinnguuppoq.
Nunamineralsip immikkut ataatsimeersurnissaa sioqqullugu Naalakkersuisut siulittaasuat Kim Kielsen, Siumut, apersorneqarusunngilaq. Taamaattumik Sermitsiaq.AG annertunerusumik allaaserisaqarsinnaanngilaq.
Atuaruk: Kim Kielsen: Nunamineralsimik naakkittaatsumik tigusiniartoqanngilaq
Atuaruk: Nunaminerals nakkaattuulerpoq
Nunamineralsi pillugu allaaserisat allat uani atuakkit