ilinniartitaanermi nutarterineq
Naalakkersuisut: Kollegiarmiut ilaat millionip affaanik isertitaqarput
Ilinniartitaanermi Naalakkersuisut nutarterininiarput. Ilinniartut akissarsiagissaartut tikkuarneqarput
Ilinniarnermusiat kollegianilu najugaqarnermut akit allanngortinneqassallutik. Ilinniartitaanermut, ilageeqarnermut, kulturimut naligiissitaanermullu naalakkersuisoq Nick Nielsen ilinniartitaanermi nutarterinermik aallartitsinialerpoq.
Nick Nielsenip eqqarsarnartoqartippaa kollegiani najugallit ilaat ukiumut 500.000 koruunit sinnerlugit isertitaqartartut qaammammut kollegiani ineqarnermut 1.700 koruuninik akiliisarmata. Nick Nielsenip aamma paasisimanerarpaa ilinniartut ilaat ukiumut 300.000 koruuninik isertitaqartartut suli ilinniarnermusiaqartut.
2016-mi atulissaaq
- Illoqarfittaarisamut nuunnerup kingorna ingammik ukiut siulliit aningaasaqarnikkut amikkisaarfiusarpoq, isumaqarpunga gruppimut tassunga ilinniarnermut tunngasunut tapersersuinerput angusassamik pitsaaquteqartumik toraagalersinnaagipput. Tamatuma aamma pilersissavaa, nunatsinni kikkunnut tamanut ilinniagaqarnissamut iserniavinnissaq pitsaanerusoq, aamma nunaqarfinniit illoqarfinniillu mikinerusunit illoqarfinnut ilinniarfiusunut ikaarsaariarneq ajornannginnerulersissavaa, Nick Nielsen tusagassiutinut nalunaarummi allappoq.
Ilinniartut kattuffii aammalu attuumaasuteqartut allat oqaloqatigineqarput. Siunertaavoq nutarterineq aningaasartuutit allanngortinnagit naammassineqassasoq.
- Ilinniagaqarnersiutigut aamma ilinniartunut ineqarfiutigut najugaq, inooqatigiinni inissisimaneq aamma angajoqqaat aningaasarsiaannut tunngasut apeqqutaatinnagit ilinniarnissamut tamanut periarfissiisariaqarput. Ilinniartitaanermut pilersaarutip suliarinerata ingerlannerani ilinniartut kattuffiinit, ilinniarfinnit suliffeqarnermilu illuatungeriinnit isummersuutinik apuussiffigineqarpunga. Oqaloqatigiinneq taanna pingaartittorujussuuara, tamanna nanginniarpara aamma aaqqissuusseqinnerup suliarineqarnissaani aggersumi annertunerulersissavara. 2016-imut aningaasanut inatsisissatut siunnersuummut aaqqissuusseqqinnerit ilanngunneqarsinnaanissaat angorusuppara, tassalu sammisaq pillugu oqallinnissamut piffissaliilluarneruvoq, Nick Nielsen nalunaarpoq.