Naalakkersuisut Københavnimi kollegiat ikiorusuppaat?
Danmarkimi kalaallit illuutaanni kisiartaalluni Københavnimi illu ilinniagaqartunut suli najugaqartitsisinnaanngilaq. Suliniut tamanna Naalakkersuisut taperserusuppaa, IA aperivoq
Kalaallit Nunaanni Kalaallit Illuutaasa sisamat kalaallit Danmarkimi ilinniagaqartut arlalinnik sullittarpaat. Illut sisamat ilaat pingasut maanna kalaallinut Danmarkimi ilinniagaqartunut aalajangersimasumik amerlassusilinnut kollegiami inissaqartitsipput. Københavnimi Kalaallit Illuutaat illuni kisiartaavoq taamaatunik atortoqanngitsoq, maannali Københavnimi illup nammineq suliniutigilerpaa kalaallinut ilinniagaqartunut inissaqartitsilernissani, tamannalu pillugu isumaqatigiissuteqalinnguatsiarluni.
- Københavnimi kollegiamik pilersitsinissamik pilersaarutit Naalakkersuisut taperserusuppaat, taamaassappallu qanoq ilillutik, aammalu Københavnimi kollegialiornissamut pilersaarutit qanoq siuarsimatigippat - pilersaarutillu qanoq isumaqarfigineqarpat.
Taamatut paragraf 37 naapertorlugu Naalakkersuisunut apeqquteqarpoq Sara Olsvig, Inuit Ataqatigiit, pissutigalugu isumaqarami Danmarkimi ilinniagaqartunut iluaqutaassasoq ilinniagaqarnermik aallartitsilluarneq, ilaatigut ajunngitsumik najugaqarnikkut.
- Nalunngilarput Danmarkimi ilinniagaqartut amerlangaatsiartut maangaannaq unitsitsisartut, ataatsimoornissamullu periarfissat aammalu ineqarnikkut ataatsimut aallartinneq ikiuutaasinnaapput ilinniagaqartut amerlanerusut ilinniarnerminnik aallartitsilluarnissaannut. Taamaattumik Københavnimi kollegia kalaallinut ilinniagaqartunut, Danmarkimi illoqarfiit pingaarnersaanni ilinniagaqartunut, periarfissaassaaq pitsaasoq, Sara Olsvig oqarpoq.