folketingip ammarnera
Naalakkersuisut Kalaallit Nunaat Savalimmiullu ikiorniarpaat
Inatsisit tunngaviusunik sulinermi aammalu Savalimmiuni Kalaallillu Nunaanni aningaasaqarniarnikkut pissutsit aaqqinnissaannut naalakkersuisut ikiuunniarlutik neqeroorutigaat. Taamatut oqarpoq ministeriuneq Lars Løkke Rasmussen, Folketingimi ammaanersiorluni oqalugiarnermini
Ullumi folketingip ukiuata aallartinnerani ministeriunerup ammaanersiorluni oqalugiarnermini pisarnertut naalagaaffeqatigiinni suleqatigiinneq eqqaavaa.
Lars Løkke Rasmussenip ilaatigut pingaratillugu oqaatigaa, Kalaallit Nunaanni Savalimmiunilu naalakkersuisut nammineq tunngaviusumik inatsiseqalernissamik anguniaqarusunnerat Danmarkip paasisinnaagaa.
Tamatumunnga atatillugu naalakkersuisut ikiuunnissaat ministeriunerup neqeroorutigaa.
– Inatsisinik tunngaviusunik sulinermi apeqqutissat naalakkersuisunik oqaloqatigiissutigerusuppavut, qulakkeerniarlugu tunngaviusumik inatsisit nutaat naalagaaffeqatigiit iluanniissinnaanerat, Lars Løkke Rasmussen oqarpoq.
Aamma Savalimmiut Kalaallillu Nunaata aningaasaqarniarnerannut atatillugu naalakkersuisut siunnersuinissamik neqerooruteqarput.
– Piffissaq ungasinnerulaartoq isigalugu nunat marluullutik aningaasaqarniarnikkut annertuunik unammilligassaqarput. Danmark siunnersuerusussinnaavoq allaffissornikkullu ikiuulluni, Savalimmiut imaluunniit Kalaallit Nunaata tamanna kissaatigippassuk, lars Løkke Rasmussen oqarpoq.
Sakkutooqarfik Issittorlu pingaartilluarpai
Thulemi sakkutooqarfimmi kiffartuussinissamik isumaqatigiissut naalakkersuisut kingulliit atuunneranni sammineqartorujussuuvoq. Ministeriunertaaq oqarpoq Thulemi sakkutooqarfimmi kiffartuussinissamik isumaqatigiissut Kalaallit Nunaannut Danmarkimullu pingaaruteqartorujussuusoq.
– Naalakkersuisullu taanna pingaartittorujussuuvaat. Sulissutigaarput Thulemi sakkutooqarfiup sapinngisamik annertunerpaamik Kalaallit Nunaannut iluaqutaanissaa. Tamanna pillugu kalaallit naalakkersuisui qanimut suleqatigaavut.
Aamma Issittoq eqqaavaa.
– Issittup ineriartortinnissaanik naalagaaffeqatigiinni aammalu Nunani Avannarlerni qanimut suleqatigiinnissaq kissaatigaara - taamatuttaaq ilaatigut Issittumi Siunnersuisoqatigiinni ataatsimoorluta suliatsigut. Issittumi periarfissat unammilligassallu nunaat nunanit tamalaanit sammineqartorujussuupput.