suliffissat

Naalakkersuisut: Ilinniartut praktikerfissaat 400-nik amerlineqassapput

Inatsisartut upernaakkut ataatsimiilerpata Naalakkersuisut inatsisissatut siunnersuummik saqqummiussiniarput, tassani ilinniartunut praktikkerfissat amerlineqarnissaat siunertarineqassaaq

Byggeri, håndværker, Permagreen
Inatsisartut upernaakkut ataatsimiilerpata Naalakkersuisut inatsisissatut siunnersuummik saqqummiussiniarput, tassani ilinniartunut praktikkerfissat amerlineqarnissaat siunertarineqassaaq

Inuusuttut suliffissaaleqinerisa annikillisarnissaa Naalakkersuisut ukkataraat.

Tassami upernaakkut Inatsisartut ataatsimiinneranni Naalakkersuisut inatsisissatut siunnersuummik saqqummiussiniarput, tassani ilinniartunik aamma praktikkertunik atorfinitsitsisoqarnerusalissalluni.

Siunnersuut siorna Inatsisartut ukiaanerani ataatsimiinneranni saqqummiunneqartussaagaluarpoq, ukioq mannalu upernaakkut ataatsimiinnissamut kinguartinneqarluni – taamaaliornermilu inatsisissatut siunnersuutip inaarutaasumik ilusilersornissaa pillugu sulisoqarnermi illuatungeriit, kommunit naalakkersuisoqarfiillu oqaloqatigineqarnissaat siunertaavoq.

Inuiaqatigiinni akisussaaqataaneq
- Mannalu inatsisissatut siunnersuut nalimmassagaq naammassivarput, inuussutissarsiornermut naalakkersuisoq Vittus Qujaukitsoq (S), Namminersorlutik Oqartussat naapertorlugit allappoq.

Inatsisissatut siunnersuutikkut ilinniartut praktikerfissaasa 400-nik amerlineqarnissaat, 2022-mullu praktikerfissat qulakkeerneqarnissaat siunertarineqarpoq.

- Suliffeqarfiit pisortallu oqartussat inuiaqatigiinni akisussaaffimmik tigusillutik nunaqavissunik ilinniartunik praktikerfissanillu pilersitsinikkut suleqataanissaat siunnersuummi siunertarineqarpoq. Taamaalilluni Kalaallit Nunatsinni suliffeqarneq piginnaassutsillu patajaallisarneqarnerat anguneqassaaq, Namminersorlutik Oqartussat oqaatigaat.

Powered by Labrador CMS