danmarkimi naalakkersuisunngortut

Naalakkersuisut ikinnerussuteqartut annertuunik unammilligassallit

Ministeriunerup Lars Løkke Rasmussenip ministerinngortitai takukkit. Naalakkersuisut politikkertik amerlanerussuteqartunik nikerartunik tunngaveqartittariaqarpaat. Tamanna ilaasortanut Atlantikup Avannaaneersunut immaqa periarfissanik nutaanik tunniussaqarsinnaavoq

Venstre, regering, Amalienborg, Lars Løkke Rasmussen
Lars Løkke Rasmussenip 18-inik ministerertalinnik ikinnerussuteqarlutik naalakkersuisunngortitai piffissamik ajornakusoortumik ornigaqarput.

Ministerit 18-it Venstremeersut nutaat.

Venstrep siulittaasuanit ministeriunermillu Lars Løkke Rasmussenimit Folketingimi partiinut politikkikkut isumaqatigiinniarnerit ulluni arfineq-pingasuni ingerlatereerlugit naalakkersuisunngortitaminik ilisarititsisumit tamanna tassaavoq ullormut nutaarsiassaq.

Naalakkersuisut ikinnerussuteqartut ikinnerpaanik 34-iinnarnik tunngaveqartut. Ministeriuneq Lars Løkke Rasmussen ilaalu amerlanerussuteqartunik 90-inik pisariaqartunik pissarsisinnaajumallutik suliamiit suliamut amerlanerussuteqartunik allanngorartunik tunngaveqartariaqarput. Oqaluttuarisaaneq eqqarsaatigissagaanni suliassaq ilungersunartoq. Ikinnerussuteqarlutik naalakkersuisuusut amerlanerussuteqarlutik naalakkersuisuusunit agguaqatigiissillugu sivikinnerusumik atasarput. Pingaartumik Venstremeersut. Politikkikkulli pissutsini taamaattoqartuaannanngilaq. Ministeriunerusimasoq Poul Schlüter ukiuni qulini naalakkersuisuutitaqarpoq.

- Tamatumali kingorna sorpassuarnik pisoqarsimavoq, AG-p aaqqissuisuunera Christian Schultz-Lorentzen oqarpoq, nangillunilu:

- Dansk Folkepartip Venstremit anginerunera Lars Løkke Rasmusssenimut immikkut unammilligassaassaaq. Taakkua Liberal Alliance assigalugu suleqataanerminnut akilersilluassapput. Partiit taakkua marluk imminnut ima pingaartitsigipput akerleriitsigisumillu politikkeqarlutik, Lars Løkke Rasmussen partiit ataatsip arlallilluunniit naalakkersuisunut peqataatinnissaannik isumaqatigiinniarnerni naapeqatigiissitsisinnaanani. De Konservativet piviusumik periarfissanngunngisaannarput.

- Lars Løkke Rasmussenip politikkikkut periusissiorsinnaanini tamaat atortariaqassavaa. Ilaatigut immaqa aamma ilaasortat Atlantikup Avannaaneersut taasineri. Folketingimi partiit quliummata katiterinissamut periarfissarpassuaqarpoq. Kalaallit Nunaannit Folketingimut ilaasortat Lars Løkke Rasmussen qeqqaniittut akimorlugit suleqatigiinnissamik aalajangiusimannippat taamaalillutik immaqa nutaamik atuuffeqalersinnaapput, AG-p aaqqissuisuunera naliliivoq.

- Tamannali naatsorsuutinik allanngortitsinngilaq. Lars Løkke Rasmussenimut partiit assigiinngitsut piumsaqataannik naammassinninniarnissaq ajornakusuussaaq, tamannalu naalakkersuisut atuunnerannut sivikillisaataasinnaavoq. Qinigaaffik tamakkerlugu atanissaat ilimagineqanngilaq. Partiit talerperliit aallaqqaammut soorunami tapersersuerpalaartumik piumassuseqassapput, soorlu Aleqa Hammondip naalakkersuisuutitaqarnerata nalaani tamanna takuneqartoq. Kisianni Partii Inuit sukaterinissaannut tunuarnissaannullu piffissaq sivisunngitsoq ingerlavoq. Politikkikkut anguniakkat isumaqatigiissutigineqanngillat. Venstrep naalakkersuisuutitai assinganik unammilligassaqarput, misilitsissutissaallu angisooq tassaassalluni 2016-imut aningaasanut inatsisissaq. Saamerliit naalakkersuisunik uppisitsinissamut qinersisitsinissamullu periarfissanik ujaasiuassapput. Partiillu talerperliit kissaataat ima assigiinngiiaartigipput, ataqatigiissitsisinnaassagaanni politikkikkut nalinginnaanngitsumik piginnaaneqartariaqarluni. Qallunaat piffissaq politikkikkut pingaarnertut sammivimmik takujuminaatsitsiviusinnaasoq ornippaat, Christian Schultz-Lorentzen naliliivoq.

Naalakkersuisunik nutaanik pilersitsinerup peqatigisaanik Folketingip siulittaasussaanik qinersisoqassaaq. Siulittaasuusimasoq Mogens Lykketoft, Kalaallit Nunaata qanoq inissisimaneranik ilisimasaqarluarlunilu paasinnilluarsimasoq aappaagu FN-iliassaaq. Venstremeersoq Berthel Haarder Atlantikup avannaanut tunngasunik aamma soqutigisaqarluartuusoq taartaasussatullu taaneqarsimasoq ministerinngussaaq. Taamaalilluni Dansk Folkepartip siulittaasorisimasaa Pia Kjærsgaard qinigaaffimmut sunniuteqarluartumut piukkunneqalerpoq.

Ministerinngortut nutaat pillugit paasissutissat takukkit

Powered by Labrador CMS