uulia
Naalakkersuisut Greenpeace kaffisoriaqqugaat
Danmark uulia pinngortitamik illersuiniaqatigiiffiup pimasaraa uuliasiornissamut misissuinermut aamma piaanissamut aalajangeeqataasinnaanissaa, pinngortitamik illersuiniaqatigiiffiup piumasarinikuuaa. Greenpeacep tamanna paatsoorluinnarsimagaa Naalakkersuisut isumaqarput
Kalaallit Nunaata imartaani Danmarkip uuliasiornissamut aalajangeeqataasinnaanissaa sapaatip-akunnerata siuliani Greenpeacep piumasaraa.
Nunatta sineriaani uuliamik mingutsitsisoqassagaluarpat Danmark iluarsaasseqataanissaanut Danmarkip aamma Nunatta isumaqatigiissuteqarsimanerat tassani tunngavigineqarpoq.
Avatangiisini upalungaarsimanermut Kalaallit Nunaat tamakkiisumik akisussaasuusoq, avatangiisinut pinngortitamullu naalakkersuisoq, Suka K. Frederiksen (S) aamma aatsitassanut naalakkersuisoq, Múte B. Egede (IA) ataatsimut tusagassiuutinut nalunaarumminni allapput.
– Kalaallit Nunaanni 3-sømilini nunavittamut killeqarfiup iluaniittoq avataaniittorlu suli akisussaaffigigitsik. Tamannalu danskit illersornissamut ministeriata aamma Namminiilivinnermut, Pinngortitamut, Avatangiisinut Nunalerinermullu Naalakkersuisup isumaqatigiissutigisaanni allanngortinneqanngilaq, naalakkersuisut marluk oqarput.
Nassuiaanissamut periarfissaqalertoq
Greenpeaace Danmark imartanut akisussaasoq Magnus Eckeskog, KNR-imut ima oqarpoq:
- Soorunami Kalaallit Nunaata aatsitassat nammineq pigivai. Isumaqatigiissummili uani uuliamik akuutissanilluunniit mingutsitsisoqassappat saliinissamut naammattunik atortussaqannginneq akuerineqarpoq.
Ingerlatseqatigiiffiit uuliasiornissamik qinnuteqarniartut sioqqutsisumik avatangiisini ajornartorsiutinik sunilluunniit iliuuseqarfiginninnissamut naammattumik upalungaarsimasuutitaqareertussaapput, Naalakkersuisut taama nalunaaruteqarput.
– Nuannaarutigaarput Greenpeacep oqariartuuteqarnerata qanoq iliortarnitsinnik nassuiaanissamut periarfissaqalersimmanga – pingaartumik misissuinermi immaqalu kingusinnerusukkut uuliamik qalluisoqalissagaluarpat upalungaarsimaneq qanoq isumagisassaanera pillugu nassuiaanissamut, Suka K. Frederiksen (S) aamma Múte B. Egede (IA) allapput.