Naalakkersuisut avoqqaarineqartut: Tapiissutinik tigumminniinnarneq unioqqutitsineruvoq
Naalakkersuisut aningaasanik nunatsinni aviisinut immikkoortinneqarsimasunik pinnguaatiginninnertik pillugu Inatsisartuni inatsisilerinermut immikkoortortaqarfimmit pappiarat suliffeqarfiup iluani allakkiat aqqutigalugit avoqqaarineqarput
Naalakkersuisut 2,5 millioner koruuninik Inatsisartuni amerlanerussuteqartunit 2014-imut aningaasanut inatsit aqqutigalugu akuersissutigineqartunik tusagassiorfimmut Sermitsiaq.AG-mut tunniussiumanngittuarsinnarnerat inatsisinik toqqaannartumik unioqqutitsineruvoq.
Taama Inatsisartut Allattoqarfianni inatsisilerinermut immikkoortortaqarfik Inatsisartut Aningaasaqarnermut Ataatsimiitita- liaannut qisuariaammi naliliivoq.
- Piumasaqaatitut aalajangersarneqarsimasunik naammassinnittunik qinnuteqartoqarsimappat Naalakkersuisut aningaasaliissutinik atuinissamut (tamakkiisumillu atuinissamut) pisussaaffeqarput, inerniliisoqarpoq.
Naliliineq Naalakkersuisunut immikkut artukkiisuuvoq, Inatsisartuni inatsisilerinermut immikkoortortaqarfimmeersuummat, taannalu Kalaallit Nunaanni aqutsinermik inatsisit iluanni qaffasinnerpaamik immikkut ilisimasaqartutut naatsorsuunneqartarmat.
Immikkoortortaqarfillu taama inerniliinermi aamma kisimiinngilaq. AG-p siusinnerusukkut Danmarkimi immikkut ilisimasallit nuimanerpaat Siulittaasup Naalakkersuisoqarfia suliami pissaaneqarneq tunngavigalugu sangutitsisimanerarlugu issuarpai.
Tamatuma saniatigut Aningaasaqarnermut Ataatsimiititaliaq isumaqatigiissoq Naalakkersuisuusimasut suliamik isumaginninnerannik isorinninnerminni nalinginnaanngitsumik erseqqissuliorput. Tamanna Aningaasaqarnermut Ataatsimiititaliap naalakkersuisoqarfiillu arlallit akornanni allaffigeqatigiissutini, AG-mit atuarneqarsimasuni, qulaarneqarpoq.
Allaaserineqartoq AG-mi pingasunngornermi saqqummersumi atuarneqarsinnaavoq. Aviisi ataani aamma pisiarineqarsinnaavoq: