Naalakkersuisut aviisinut tapiissuteqarniarnatik aalajangerput

Naalakkersuisut aviisinut nuna tamakkerlugu saqqummersartunut marlunnut Sermitsiamut Atuagagdliutinullu tapiissuteqarumajunnaarput.

Ingerlalluarput, Naalakkersuisut siulittaasuat Siumumeersoq Aleqa Hammond tunngavilersuivoq. Tamanna Naalakkersuisunit tusagassiuutitigut nalunaarummi atuarneqarsinnaavoq.

Aviisit nuna tamakkerlugu saqqummersartut tapiissutinik ukiumut qinnuteqarsinnaapput, ukioq mannallu tapiissutit 2,5 millioner koruuniullutik. Aningaasaateqarfiup Inuussutissarsiornermik Ingerlatsisup Sermitsiaq.AG-p periarfissaq taanna atussallugu aalajangerpaa, taamaattumillu tapiissuteqarfigineqarnissamik qinnuteqarsimalluni.

Tusagassiuutitigut nalunaarut naapertorlugu Aningaasaateqarfik Inuussutissarsiornermik Ingerlatsisoq Sermitsiaq.AG ukiuni kingullerni pingasuni 5,7 millioner koruunit sinnerlugit sinneqartoorpoq. Qulaani sinneqartoorutinik taaneqartuni 5,5 millioner koruunit tapiissutaasimasut ilanngunneqanngillat, taakkuuppullu aningaasaateqarfimmut Naalakkersuisunit ukiuni kingullerni pingasuni katillugit tapiissutaasimasut. Tapiissutit ilanngullugit sinneqartoorutit piffissami tassani katillugit 11,2 millioner koruuniusimapput.

Læs: Sermitsiaq.AG er skuffet over årsresultat

Taamaammat qinnuteqaat itigartinniarlugu Naalakkersuisut aalajangerput Sermitsiaq.AG-ip aningaasaqarnikkut inissisimalluarnera tapiissutinillu pisariaqartitsinani aalajaatsumik ingerlanera tunngavilersuutigalugit.

Naalakkersuisut tapiissuteqartarnerminni aningaasaateqarfiup nuna tamakkerlugu saqqummersitsisarnerata qulakkeernissaa aallaqqaammut siunertaraat. Tapiissutit ukiunut pingasunut tunniunneqarput, taamaaliornikkut siammarterinermi aqqutissat allat siuarsarnissaannut imaluunniit tunisassiornermut naammassisaqarfiunerusumut teknologimik iliuuseqarnissamut aningaasaateqarfik periarfissinniarlugu.

Nutaarsiassaq nuannersoq

Taamaattumik ukioq manna tapiissutinik qinnuteqaat itigartissallugu Naalakkersuisut aalajangiinerat nikalluutissaanngilaq - akerlianilli nutaarsiassaavoq nuannaarutissaasoq, Naalakkersuisut siulittaasuat Aleqa Hammond naqissusiivoq.

- Aviisip ukiut kingulliit ineriartorfigisimavaa kusanartunillu angusaqarluni, siunissami unammilligassanut ullumikkut sillimmatissaqarlualersimalluni. Tamatuma saniatigut akiitsutik ikilingaatsiarpaat. Tamanna killilersugaanani oqaaseqarsinnaanermut nutaarsiassatsialaavoq. Tamannami isumaqarpoq, aviisit Sermitsiaq aamma AG tusagassiorfittut kiffaanngissuseqartutut pituttugaanngitsutullu imminnut napatissinnaanerminnut piareersimalersut, Aleqa Hammond tusagassiuutitigut nalunaarut naapertorlugu oqarpoq.

Naalakkersuisut sipaarniutit atorlugit Kalaallit Nunaanni tamarmi tusagassiutit tapiissutinik qinnuteqarnissamut siunissami periarfissaqalersippai.

Uani annerusumik atuarit: Mediedirektør: Jeg er meget overrasket