eqqakkanik passussineq
Naalakkersuisut avatangiisinut millionilikkaanik immikkoortitsipput
Avatangiisinut tunngasunut millionilikkaanik marlunnik kisitsisitaqartunik immikkoortitsisoqarpoq, taakku nunaqarfinni illoqarfinnilu pitsaanerusumik eqqakkanik passussisoqarnissaanik qulakkeerinnissapput
Naalakkersuisut ukiunut tulliuttunut marlunnut kommunit eqqagassanik assartuussinermut suliniutaannut 15,5 mio. koruunit immikkoortippaat.
Avatangiisit, peqqinnissaq inuiaqatigiillu aningaasaqarnerat eqqarsaatigalugit illoqarfinni nunaqarfinnilu eqqagassat passunneqartussat amerlassusaannut unammilligassani qitiusumik eqqagassanik ikuallaaveqarnissaq aaqqiissutissatut pitsaanerpaatut naliliiffigineqarpoq, Namminersorlutik Oqartussat tusagassiuutinut nalunaarummi ilisimatitsipput.
Eqqakkanik piiaanissamut periaatsinik nutaanik misileraanissaq kissaatigineqarmat suliniummut tassunga millionilikkaanik immikkoortitsiniarlutik aalajangerlutik, pinngortitamut avatangiisinullu naalakkersuisoq, Suka K. Frederiksen (S) tusagassiuutinut nalunaarummi ilisimatitsivoq.
- Nunaqarfinni illoqarfinnilu minnerusuni amerlasuuni ikuallaaviit atorsinnaanngillat, taamaattumillu eqqakkat eqqaavissuarni katersuupput. Sumiiffinni minnerni eqqakkanik illoqarfinni annerusuni ikuallaavinnut assartuussilluta misilinnialerparput. Qinigassatut allatut aamma nunanut allanut eqqakkanik assartuisoqarsinnaavoq. Naalakkersuisut periarfissaq suliffinnik nutaanik pilersitsivissatut tamatumalu peqatigisaanik saliinissamut periarfissatut isigaat, taanna erseqqissaavoq.
Atuaruk: Nunaqarfinni eqqagassalerineq naammaginanngilaq
Pitsaanerusumik eqqagassanik passussineq
Eqqagassalerineq kommunit suliassaraat, 'kisiannili matumani suliniuteqarnikkut Naalakkersuisut nunaqarfinni illoqarfinnilu eqqagassalerinerup pitsaanerulernissaa qulakkeerniarlugu kommunit sulineranni tapersersorniarpaat', Suka K. Frederiksen nassuiaavoq.
Aningaasaliinermi kommunit tamarmik immikkut sulisumik avatangiisit pillugit suliaqartussamik, suliniummut tapertaasussamik atorfinitsitsinissaq periarfissanngussasoq Namminersorlutik Oqartussat ilisimatitsipput.
Avatangiisit pillugit suliaqartussat eqqagassalerinermi aaqqiissutissanik atulersitsinissamik siuarsaanissaq qulakkeeriniarnissarlu siunnerfigalugit sulinissaat eqqarsaatigineqarpoq. Tamatuma saniatigut sulilersussat suliffeqarfiit najugaqarfiillu eqqaanni nunaminertanik saligaatsuutitsinissamut maleruagassat pillugit paasititsiniaanissaq malinnitsitsinissarlu siunnerfigissavaat, Namminersorlutik Oqartussat nalunaarput.