avaleraasartoorniarneq

Naalakkersuisut avaleraasartuunik 85.000 tonsinik pisasseeqqipput

Politikerit aalisakkanik ikerinnarmiunik 2015-imisut amerlatigisunik pisassiipput

Avaleraasartoorniarneq ukiaru aallarteqqissaaq

Naalakkersuisut marsip 22-anni aalajangiipput 2016-imi Tunumi avaleraasartoortassat 85.000 tonsiussasut.

Taamaasilluni pisassiissutit siornatut amerlatigipput, siornali umiarsuaatileqatigiit pisassat tamakkinngilaat, imaq nllerpallaaqimmat aalisakkallu ikerinnarmiut tamaaniittut ikippallaaqimmata.

Aamma ammassassuit

Tamatuma saniatigut politikerit ammassassuarnik saarullernanillu misileraallluni aalisarnissamut 20.000 aamma 15.000 tonsinik pisassiipput.

Tamatumalu saniatigut politikerit aalajangiuppaat avaleraasartoorniarnermi aalisakkanillu ikerinnarmiunik allanik aalisarnermi sinaakkutassat qanoq ittuussanersut.

Suliffinnik pilersitsissaaq

Naalakkersuisut pingaarnerusutut anguniagaraat Kalaallit Nunaanni aalisakkanik ikerinnarmiunik aalisarnerup ineriartortinnissaa, aningaasarsiornikkut, suliassaqartitsinikkut uumassuseqarnikkullu atasinnaassusilimmik.

Taamaasilluni aalisarneq inuiaqatigiinnut sapinngisamik annertunerpaamik iluaqutissiissaaq - angallatini suliffitsigut kiisalu akitsuutitigut akileraarutitigullu landskarsimut isertitatigut.

Ukiuni kingullerni avaleraasartoorniarnermi nunat allamiut umiarsuaat amerlasuut atorneqartarsimapput. Kalaallilli angallataat Kalaallit Nunaannut annertunerpaamik aningaasarsiortitsisimapput, naalakkersuisut erseqqissaapput.

Amerlavallaartut

Ilanngillugu Naalakkersuisut aalajangiipput ukioq manna selskabinut nutaarluinnarnut pisassiisoqassanngitsoq.

– Ukiuni kingullerni Tunumi ikerinnarmiunik aalisarnermi angallatit aalisartut amerlavallaartarsimapput. Tamarmillu pimoorussivinneq ajorput. Taamaattumik ukioq manna piumasaqaateqarpugut, uppernarsarneqassasoq pisassiissutigineqartut qanoq pilersaarutigineqarnersut, Naalakkersuisut.gl naapertorlugu Aalisarnermut, Piniarnermut Nunalerinermullu Naalakkersuisoq Karl-Kristian Kruse erseqqissaavoq.

Ineriartorneq

2016-imi qinnuteqartunut ilaatigut piumasaqaataavoq Kalaallit Nunaanni aalisarnermi imaluunniit aalisakkanik tunisassiornermi allanik ingerlataqariissasut. Qinnuteqartullu nassuarsinnaassavaat aalisarnissamut akuersissut pissarsissutigilluassallugu, tamatumuuna isertitat umiarsulaatileqatigiiffiup pingaarnerusutut sammisaanik ineriartortitsinermut atorneqassallutik.

Tunumi avaleraasartoorniarneq aalisarneruvoq aaqqissuussaq aningaasarsiutaasoq, sulili ingerlanneqarluni aalisarnermut inatsimmi misileraalluni aalisarnermut aalajangersagaq malillugu, tassuuna aalisarnermut inatsimmi piumasaqaatit allat saneqqutaarneqarsinnaammata.

Immikkoortut pingasut

Tunumi avaleraasartoortassiinermi makkuna tunngavussapput:

Immikkoortoq 1: Pisassanidt 35.000 tonsit kalaallit angallataannut avaleraasartoorniarnermut atorneqartunut tunniunneqassapput. Kalaallit angallataat tamarmik aalisarfik naallugu avaleraasartoorniarnissaminnut periarfissinneqarput.

Immikkoortoq 2: Pisassanit 20.000 tonsit nunat allamiut angallataannut, selskabinit immikkoortoq 1-imiittunit attartorneqartunut, tunniunneqassapput.

Immikkoortoq 3: Pisassanit 30.000 tonsit nunat allamiut angallataannut, selskabinit angallataateqanngitsunit avaleraasartoorniarnermut attartorneqartunut, tunniunneqassapput.

Angallatit tamarmik avaleraasartoorniarnissamut akuersissummik pigisallit, aamma Tunumi misileraalluni saarullernanik aalisarnissamut akuersissummik tunineqarsinnaapput.

Powered by Labrador CMS