attuumassuteqarneq
Naalakkersuisut attuumassuteqarnerannut IA apeqquteqarpoq
Qaqugukkut killissarititaq qaangerneqartarnersoq Naalakkersuisut ilisimaneraat, partiip illuatungiliuttup akissutissarserusuppaa
Tunngaviusumik pisortat ingerlatsineranni inatsisaasut, soorlu suliassat suliarineqartarnerannut inatsisit aamma suliami qaqugukkut peqataasinnaannginnermi tunngasut Naalakkersuisut paasisimavaat?
Taakku apeqqutit Inuit Ataqatigiit Inatsisartunut ilaasortaatitaasa akissutissarserusuppaat.
Attuumaavallaartoq?
Ilaasortat taamaattumik Naalakkersuisut arfinilinnik apeqquteqarfigaat, ilaatigullu akissutissarserusullugu Naalakkersuisut aalajangiisartutut immikkoortissinnaaneraat qaqugukkut attuumassuteqarpallaartoqartarnersoq - tassa imaappoq ilaqutaasunut attuumassuteqarpat aalajangiisinnaatitaanani.
Atuaruk: KNT-mik suliaq: Kielsenip nerrivik patippaa
KNT-mik suliaq
Naalakkersuisut siulittaasuata Kim Kielsenip (S) 4.250 tonsinik tunisassiorfimmut KNT-mut avaleraasartoortassanik tunniusisimanera assortuussutaasoq peqqutigalugu taamatut saaffiginnissuteqarneq pivoq.
Siumumi allattaaneq Mikael Petersen KNT-mi pisortaavoq, taamatullu parteeqataa, aalisarnermut naalakkersuisoq Karl-Kristian Kruse, suliffeqarfimmit tassannga pilersitseqataavoq aqutsisuniillunilu, kingusinnerusukkullu atorfini ernerminut ingerlateqqillugu. Karl-Kristian Kruse attuumassuteqarpallaarnini nalunaarutigaa, kisianni avaleraasartoortassanik qinnuteqarneq aallartissimalereersoq.
Atuaruk: KNT-mi pisortaq: Pasilliinerit eqqungaatsiarpaatigut
Kingusinaartoq
Kukkunersiuinermik suliaqartut Deloitte pisoq pillugu nalunaarusiaminni erseqqissarpaat, Karl-Kristian Kruse pisassiissutit agguaanneqarneranni aalajangiinernut sunneeqataasimanngitsoq, kisianni naalakkersuisoq illuatungaanik piffissamik kingusissukkut attuumassuteqarpallaarnini nalunaarutigisimagaa kukkunersiuisut naliliipput.
Ukioq manna avaleraasartoortassiinermut atatillugu naammattumik ammasoqarsimannginnera, Deloittep nalunaarusiamini ilanngullugu tikkuarpaa. Taamatut isornartorsiuisoqarnera IA aalajangiinerup ingerlaneranut apeqqutissaqalersippaa.
Kammalaatersornerup nungutinneqarnissaa
- Inuit Ataqatigiit aalajangiisuulluinnartutut isigaat qanigisanik immikkut pinninnerit, pissaanermik atornerluinerit kammalaatersornerillu nungutinniarnissaasa suliarineqartuarnissaat, aamma inuussutissarsiutitta pingaarnerpaap aalisarnerup iluani. Tassanerpiarlu nunatut takutittariaqarparput pinngortitami pisuussutigut kiisalu nunatta aningaasaatai ersarissunik tunngaveqarluni illersorneqarsinnaasumillu ingerlassinnaagigut, Inatsisartuni ilaasortat apeqquteqarnerminni ilaatigut taama tunngavilersuuteqarput.