akiliisitsineq
Naalakkersuisut akiliinerluttartunut sukaterilerput
Akiliisitsiniarnermut aaqqiissut nutaaq, Ilanngaassivik, pisortat aningaasat pisassatik tigunissaat qulakkiissavaa
2018 aallarnerfigalugu Namminersorlutik Oqartussat aamma kommunit innuttaasut akissarsiaasa ilaannik, akissarsiat suli tiguneqannginnerini tigusisinnaanngussapput, pisortanut aningaasartuutit arlaqartut akilerneqarnissaat qulakkeerniarlugu.
Akiliisitsiniartarnermut aaqqiissut nutaaq Ilanngaassivimmik taaguuserneqarpoq.
Aningaasaqarnermut naalakkersuisoq, Randi Vestergaard Evaldsen (D), KNR-imut taama ilisimatitsivoq.
Atuaruk: Pisortanut akiligassat: 30.000-it akiligassaqarput
Ineqarnermut akiliut
Assersuutigalugu ineqarnermut akiliut, kiassarnermut akiliut kiisalu meeqqerivinnut meeraaqqerivinnullu akiliutit, innuttaasup akissarsiani tigunnginnerani taamatut akiliisalersinnaapput.
- Naapertuilluanngikkaluarpoq pisariaqarporli. Ileqqorisanik allannguisitsissaaq imminnullu pilersorsinnaalernissaq pisariaqarpoq. Pisortaniit taamatut malittarisassiorneq uggornarlunilu ajuusaarnaraluarpoq, ajoraluartumilli pisariaqarpoq, Randi Vestergaard Evaldsen KNR-imut oqarpoq.
Atuaruk: Amerlanerusut akiitsutik akilertalerpaat
Pilersaarummut ataatsimoortumut ilaasoq
Innuttaasut pisortanut akiligassaat 900 millioner koruuniupput.
Suliniut naalakkersuisoqatigiit attassisinnaanermut siuariartornermullu pilersaarutaasa arlaqartut ilagaat, taakku siunissami atugarissaarnissamut akissaqarnissamut qulakkeerinnittuussapput.