angusarissaarneq
Naalakkersuisut Air Greenland nersualaarpaat
- Air Greenland A/S-imi ingerlalluartoqarnera takusinnaagatsigu ingerlatseqatigiiffillu pitsaasumik angusaqarmat nuannaarutigaarput, Naalakkersuisut ilaatigut oqaaseqaateqarput
- 2013-imi angusat naammaginartutut isigaavut.
Air Greenland A/S-ip kulturikkut illorsuarmi Katuami Nuummiittumi ileqquusumik ataatsimeersuarnerani Naalakkersuisut angusaasunut taama oqaaseqarput.
Ataatsimiinneq nalunaaqutaq 15.00 ingerlanneqarpoq, suliffeqarfiullu ukiumoortumik nalunaarutaata akuersissutigineqarnissaa ataatsimeersuarnermi oqaluuserineqarpoq.
- Air Greenland A/S-imi ingerlalluartoqarnera takusinnaagatsigu ingerlatseqatigiiffillu pitsaasumik angusaqarmat nuannaarutigaarput. 2013-imi angusat naammaginartutut isigaavut, ukiumilu aggersumi suleqatigiilluaqqinnissatsinnut qilanaarpugut, Naalakkersuisut siulittaasuat Aleqa Hammond oqarpoq.
2012-mit naleqqiullugu annikinnerusoq
Air Greenlandip suliffissua 2013-imi akileraannginnermini 63,2 millioner koruuninik sinneqartooruteqarpoq. Akileraareernermi inernerusoq 41,2 millioner koruuniuvoq.
Suliffissuup naatsorsuutitigut angusai akileraannginnermi 2012-imut naleqqiullutik 43,6 millioner koruuninik ajorseriarput. 2012-imi naatsorsuutitigut angusat sanaartukkanik pigisanik tunisinermi isertitanit 20,1 millioner koruuniusunit sunniuteqarfigineqarput, kiisalu 2013-imi angusat qulimiguulinnik EC225-nik marlunnik pisinerup taamaatinneqarneranit aammalu Amadeus Altea-p atulersinneqarneranut aningaasartuutinit sunniuteqarnerluffigineqarlutik.
Ukiumi angusat tunngavigalugit Namminersorlutik Oqartussat sinniisai marluk, Jens Willumsen aamma Julia Pars, qinerneqaqqipput.