aatsitassat
Naalakkersuisut aatsitassarsiorniat isumaqatiginngilaat
Aatsitassarsiorniarluni qinnuteqaat kigaappallaamik suliarineqarnerarlugu namminersorlutik oqartussat isorineqarput – Naalakkersuisut taamaannginnerarpaat
Tanbreez Miningimik piginnittoq Greg Barnes namminersorlutik oqartussanut utaqqikatappoq Killavaat Alannguanni aatsitassanik qaqutigoortunik atuisinnaanissamut qinnuteqaanni suli akineqanngimmat. Taanna isumaqarpoq kigaappallaamik sulinikkut Nunatta aatsitassarsiorfinngorniarnera kinguarsarneqartoq. Naalakkersuisulli allatut isumaqarput.
Australiamiut aatsitassarsiorfiat Tanbreez Mining Killavaat Alannguanni aatsitassanik qaqutigoortunik atuinissamut qinnuteqaammik siorna aggusti naalersoq tunniussivoq. Akuerinassanersulli suli nalorninartoqarpoq.
Allat sukkanerupput
Taamaattumik Greg Barnes namminersorlutik oqartussanut isornartorsiuivoq
- Nunani allani qaammatit pingasut, arfineq-marlulluunniit akuersissummik piniarlutik utaqqisarput, taamaattumik nunanut allanut sanilliutissagaanni Kalaallit Nunaat unammillersinnaanngilaq, Greg Barnes KNR-mut oqarpoq.
Maanna Naalakkersuisut akissuteqarput kigaappallaamik sullissineraaneq tunngavissaqannginnerarlugu.
- Qinnuteqaat tamanut ammasumik tusarniaassutigineqartussanngorlugu aammalu isummerfigineqartussanngorlugu tunniunneqartutut isigineqassappat, minnerpaamik tunngavissarititaasut naammassisimaneqartussaapput. Assersuutigalugu eqqortumik suliassap avatangiisinut sunniutissai nassuiarneqartussaapput, inuussutissarsiornermut, aatsitassanut sulisoqarnermullu naalakkersuisoq Jens-Erik Kirkegaard Siumumeersoq oqarpoq.
Toqunartullit
Tanbreez Miningip qinnuteqaatai siulliit utertinneqartarsimapput sukumiinerusumik nassuiaaseqqaarlugit aatsaat suliarineqarsinnaasut unnerlugit.
- Amigaataasorpassuit ilai taaneqarsinnaasut ilaatigut tassaapput: Toqunartoqassutsimut uttoortaanerit amigaataapput (Eqqagassat qanoq toqunartoqartiginersut); Kuummi eqaloqartartumi aalisakkat inissiinermi ajoquserneqannginnissaannik qulakkeerisussat uuttortaanerit amigaataapput; Pujoralaat siammartarnerisa eqqoriarneqarnissaat amigaataavoq; Erngup nukinganik atuisoqarsinnaanersoq nalilersuineq amigaataavoq il.il. Tamatuma saniatigut najoqqutassat oqaatsit eqqortut atorlugit tunniunneqanngillat, Jens-Erik Kirkegaard uparuaavoq.
Taassuma aamma Tanbreez Mining isornartorsiorpaa naammattumik nassuiaasimannginnerarlugu sooq aatsitassat Nunatsinni suliariniannginneerlugit taamalu suliffissanik amerlanernik pilersitsillutik. Aatsitassat suliarinerinut sulisut 160-it missaat atorneqartussaapput aatsitassallu qallornerinut sulisut 80-it missaat atorneqartussaallutik
- Taamaalilluni suliffissarpassuit tassani pineqarput, taamaattumik immikkoortup taassuma misissorneqarnissaa sukumiisumillu nassuiarneqarnissa Naalakkersuisut pingaartittorujussuuat, Jens-Erik Kirkegaard oqarpoq aammalu isumaqarluni aatsitassanut inatsimmi piumasaqaatit Tanbreez Miningip tamakkiisumik naammassisimanngikkai.