Aningaasanut inatsit

Naalakkersuisut 2016-imut aalisarnermut pilersaarutaat imaappoq

Avataani nunallu iluani aalisarnermi aalisakkat suulluunniit tamaasa Anda Uldumip akitsuuserniarpai. Ilanngullugulu inuussutissarsiummi tamatumani sullissineq nukittorsarniarlugu

– Nalunngilarput naalakkersuisooqatigiinni partiit tamarmik siunnersuut isumaqatiginngikkaat, kikkulli tamarmik immap pissuussutaanik aalisarsinnaatitaassagunik pinngitsooratik aningaasarsiornermut ikiuuttariaqarput.

Taamatut oqarpoq aningaasaqarnermut Naalakkersuisoq Anda Uldum, Demokraatit, 2016-imut aningaasanut inatsisissatut siunnersuut saqqummiukkamiuk. Tassani pineqarpoq aalisartut tamarmik - aamma sinerissamut qanittumi umiatsiaararsortut - aalisarnermi peqataanerminni akitsuutinik akiliisalernissaat.

Akitsuutit amerlanerusut

Aalisakkat qaleruallillu, angallatinit nunamut tulaanneqartartut assigiinngitsut tamaasa, Naalakkersuisut akitsuutitigut iluanaarniarfigerusuppaat.

Ullumikkut avataasiorluni raajarniarneq, qaleralinniarneq avaleraasartoorniarnerlu akitsuuteqartinneqareerput. Aallaavittulli landskarsi 2016-imi aalisarnermit tamarmit pissarsiaqassaaq. Tassa imaappoq, aaliakkat suulluunniit, assersuutigalugu saarulliit, suluppaakkat nipisaallu, annertuumik aalisarneqarpata akitsuuserneqassapput.

Immikkut 15 millioner koruunit

Politikerit naatsorsuutigaat akitsuutit amerlisinnerisigut landskarsi 2016-imi immikkut 15 millioner koruuninik isertitsissasoq, 2017-imiillu ukiumut isertitat 50 millioner koruuninngorumaartut.

Tamatuma saniatigut Naalakkersuisut ilimasaarutigaat, aalisarnermik inuussutissarsiortut oqaloqatigereerlugit, aalisakkat ikerinnarsiortut akitsuuteqalersinniarlugit, taavalu pilersaarutit malillugit aalisakkanut artinut tamanut akitsuutit nutaat 2017-imi atuutilersinneqalissapput.
Aalisakkanik ikerinnarmiunik pisanut akitsuuteqartitsinermi pingaarutilik tassaavoq, angallatit kalaallinit pigineqartut, angallatinit nunanit allanit attartorneqarsimasunit, annikinnerusumik akitsuuteqartinneqarnissaat.

Ingerlatsineq pitsaanerusoq

Tamatuma saniatigut Naalakkersuisut Aalisarnermut Piniarnermullu Naalakkersuisoqarfimmut aningaasaliissutit 2,7 millioner koruuninik amerlivaat, tamatumani ingerlatsineq nukittorsarniarlugu. Aningaasaliissutitigut nutaatigut minnerunngitsumik naalakkersuisoqarfiup ikerinnarmiunik ingerlatsinera nukittorsarneqassaaq.

Ukioq manna avaleraasartoorniarnissamut akuersissutit kingusinaartorujussuarmik tunniunneqarput, pissutsillu taamaattut pineqaqqeqqunagit naalakkersuisoqarfik amerlanerusunik atugassinneqarpoq.

Aningaasat namminersorlutik oqartussani aalisarnermut aningaasaliissutinit tiguneqarput.

– Nalunngilarput ukiuni kingullerni tikkuarneqartartoq suleriaaseq pitsaavallaanngitsoq. Isornartorsiuineq tusaatissatut tiguarput. Naalakkersuisoqarfillu (aalisarnermut naalakkersuisoqarfik, aaqqiss.) aalajangersimavoq sullissineq pitsanngorsarniarlugu, Anda Uldum oqarpoq.

Powered by Labrador CMS