Naalakkersuisup siunnersortimi eqqartuussaasimanera tupaqqassutigigaa

Pinngortitamut, avatangiisinut inatsisinullu atuutsitsinermut naalakkersuisup politikkikkut siunnersortaa, Gerth Platou Jacobsen, ingerlaannartumik atuutilersumik suliunnaarpoq 2010-mi Aasianni politiini pisortaanermi nalaani sakkortuumik nakuusersimasutut eqqartuussaasimanini KNR-imit qaqilerneqareersorlu.

- Soorunalimi tupannarpoq tusarlugu susoqarsimanersoq. Kisianni ajoraluartumik annertunerusumik oqaaseqarsinnaanngilanga suliaq inummut ataasiakkaamut tunngammat, taama pinngortitamut, avatangiisinut inatsisinullu atuutsitsinermut naalakkersuisoq, Atassummeersoq Mala Høy Kuko Sermitsiaq.AG-mut oqarpoq.

KNR-ip paasissutissiinera najoqqutaralugu Gerth Platou Jacobseni marloriarluni sakkortuumik nakuusersimasutut ulluni 40-ni pineqaatissinneqarsimasunut inissiisarfimmiittussanngorlugu Nunatta Eqqartuussisuuneqarfianit eqqartuunneqarsimavoq. Nakuusernerit sakkortuut marluk pisimapput Gerth Platou Jacobsenip Aasiaat Politiivini 2009-mi pisortaanerata nalaani. Nakuusernerullu aamma pisimavoq politiitut biiliani.

Atuaruk: Siunnersorti eqqartuussaasimanini qaqilerneqareersorlu suliunnaartoq

Siunnersortimi pineqaatissinneqarsimanera ilisimanngilaa
Mala Høy Kúko ilisimatitsivoq nammineq ilisimasimanngikkini maanna politikkikkut siunnersutigiunnaakkami, Gerth Platou Jacobsenip, sakkortuumik nakuusersimasutut eqqartuunneqarsimanera, januaarimi politikkikkut siunnersortissamisut innersuunneqareersorlu atorfinitsikkamiuk.

Kisianni kiap, 2014-imi Upernavimmi Inuussutissarsiornermut siunnersuisooqatigiinni siulittaasuusoq, 44-nik ukiulik Gerth Platou Jacobsen, pinngortitamut, avatangiisinut inatsisinullu atuutsitsinermut naalakkersuisumut politikkikkut siunnersortissatut innersuussimaneraa, Mala Høy Kukop Sermitsiaq.AG-mut oqaatigerusunngilaa.

- Gerth Platou Jacobsenip politikkikkut siunnersortitut atorfini qimanniarlugu aalajangerpoq uannut imaluunniit Naalakkersuisunut tamakkiisumik nanertuutaarusunnginnami, Mala Høy Kuko oqarpoq.

Soraarnerani piumasaqaatissat suli inissinngillat
Atassummeersup Mala Høy Kukop ilanngullugu aamma ilisimatitsissutigaa Naalakkersuisoqarfimmini atorfilittat politikkikkut siunnersortigisimasami atorfimminit soraarnermit atugassarititassai maanna misissuiffigileruttoraat.

Politikkikkut siunnersortissarnik allamik atorfinitsitsiniarpit?

— Tassa suli tamanna eqqartunngilarput, Mala Høy Kuko oqarpoq.

Gerth Platou Jacobsenip KNR-imut ilanngullugu ilisimatitsissutigisimavaa nammineq nalilersimagini eqqartuunneqarsimanini Naalakkersuisunut inatsisinik atortitsinernut tunngasuni siunnersuisarnissaminut aporfiunavianngitsoq, eqqartuunneqarsimanera ukiut arlallit matuma siorna pisimammat.

Atuaruk: Naalakkersuisumut immikkut siunnersortimik atorfinitsitsisoqaqqippoq