Naalakkersuisup Sermitsiaq.AG isornartorsiorpaa

Inuussutissarsiornermut aatsitassarsiornermullu naalakkersuisup Jens-Erik Kirkegaardip Sermitsiaq.AGmi allaaserineqartoq 'Kirkegaard tunuarnialersaanngilaq: Naalakkersuisuuginnassaanga' nittartakkami saqqummiunneqartumut ilumuunnginneraavoq allaaserisamillu uterteqqusilluni. Allaaserisami Jens-Erik Kirkegaardip Naalakkersuisuuginnarnissani naqissuserpaa.

Tusatsiarneqarpoq naalakkersuisutut ilaasortatut tunuassasoq, tamannalu pillugu Sermitsiaq.AG apeqquteqarpoq. Naalakkersuisutut tunuassanersoq allaaserisami aperineqarpoq.

Jens-Erik Kirkegaard apersorneqarnermini ilaatigut ima oqarpoq:

- Oqaatigeqqissavara: Tusatsiagarineqarsimasut suminngaannit aallartinnersut ilisimanngilara. Suliffigisara nuannaraara. Aatsitassarsiorneq arriippallaamik ingerlasoq isumaqaannarpunga.

Tusagassiutinut nalunaarummi Jens-Erik Kirkegaard ima qisuariaateqarpoq:

- Sermitsiaq.AG-ip nittartagaani oqaluttualiaq akuerisinnaanngilara, Naalakkersuisutut atorfinnut ajoqusiiginnarpoq. Aamma tusagassiortutut ileqqorissaarnissamik malerugassanut uniuuppoq, tassami takussutissaqanngilaq, misissuisoqaqqaarsimanngilaq inummilluunniit allamit tatiginartumik oqaaseqaammik pissarsisoqarsimanani.

Allaaserisaq peerneqassanngilaq
Naalakkersuisup 'aviisi kaammattorumavaa tusagassioriaatsiminnik nalilersueqqullugit aamma tusagassiuinermi ileqqorissaarnissamut maleruagassat eqqarsaatigeqqeqqullugit, tassami nittartakkami oqaluttuarisaq tusagassiortutut pitsaasumik mississueqqissaarsimanermik amigaateqarmat, takussutissaqarani, tatiginartumiillu allamit oqaaseqartitsisoqarsimanani. Eqqortumik paasissutissiinermik saqqummiussisoqanngilaq. Oqaluttuariniagarlu saqqummiussimasariaqanngikkaluarpoq', Jens-Erik naliliivoq.

Allaaserineqartoq utertinneqassanngitsoq Sermitsiaq.AGp nittartagaani pisortap Søren Duran Duusip oqaatigaa.

- Pissaanermik tigummialinnut apeqqutilliisarnissatsinnut pisussaaffeqarpugut. Tamanna Naalakkersuisunut ilaasortaasut akuerisariaqarpaat, soorlu Nunatsinni politikkikkut aningaasaqarnikkulluunniit equngasoqaraangat apeqqutilliisartugut.

Nittartakkami pisortap Jens-Erik Kirkegaard tusagassiornermi Maalaartarfimmut saaffiginnissinnaanera innersuuppaa.