Naalakkersuisup inissialiortarnerup pitsaanerulernissaa kissaatigaa

Sanaartornerup iluani sulialinnut ataatsimiisitsinissamut Ineqarnermut Naalakkersuisoqarfik qaaqqusinerani ineqarnermut naalakkersuisoq Siverth K. Heilmann, Atassut, assigiinngitsunik oqallititsiniarpoq.

- Silap pissusiata unammiligassattalu allat immikkut ittut, pitsaassuseq minnerpaamik nunarsuarmi sumiiffinni allani atorneqartutut qaffasitsigisoq atorlugu sanaartornissamut, akornusiisarnerannut akuersiinnartarnerput
taamaatittariaqarparput. Allatut oqaatigalugu sanaartornermi pitsaassuseq qaffattariaqarparpoq, meeqqavut kinguaassagullu tulliuttut inissiaatitta siusippallaamik aserfallattarnerini unammilligassanik, ullumikkut atukkatsinnik atugaqassanngippata, oqarpoq.

Inissialiornermik sanaartortartut suleqatigiinnerusariaqartut naalakkersuisoq isumaqarpoq, ataatsimullu 'sanaartoriaatsimut pitsaanerusumut aqqutissaq' anguneqassalluni.

- Tamatuma saniatigut sanaartoriaatsinik, silap pissusianut naleqquttunik ineriartortitsinissarput nunatsinnut pingaaruteqarpoq. Sanaartoriaatsit nungusaataanngitsumik aammattaaq najukkani atortussanik pilersinneqartunik sulisunillu, avatangiisinut suliffissaqartitsinermullu iluaqutaasumik atuiffiusinnaasut, Siverth K. Heilmann ataatsimiittoqarnissaa sioqqullugu oqarpoq.

Sulisitsisut Peqatigiiffiat isumaqataavoq
Kalaallit Nunaanni Sulisitsisut Peqatigiiffiata pisortaata Brian Buus Pedersenip naalakkersuisumit piumasarineqartut nuannaarutigineqarput:

- Kalaallit Nunaanni sanaartornermi suliassat iluatsilluartut amerlasuut suliarineqarsimapput, kisiannili aamma ajoraluartumik sanaartukkanut pitsaanerusumik sananeqarsinnaagaluartunut assersuutissaqarpoq. Sanaartornermi aammalu assersuutigalugu inissiani aserfallatsaaliuinermi pitsaassutsip qaffasinnerusup anguneqarnissaa ataatsimut susassaqarfiuvoq ataatsimullu soqutigisaqarfiulluni.