Naalakkersuisup allattaata Facebookikkut allataa aalassatitsivoq

Aleqa Hammondip Folketingimut qinigassanngortinnera tusarliunneqareersoq, Siumumi siulittaasoq Kim Kielsen tamanna pillugu oqaaseqartitsiniaraluarnerit suli iluatsiffiunngillat.

Naalakkersuisut siulittaasumut allattaasup Facebookikkut allataa taamaammat aalassassimaarutigineqarluarpoq.

Ima allappoq:

'Amerlanerussuteqartut piumasaraat?

Isummersornera immaqa politikkikkut suliaqarninnut naleqarsinnaavoq. Kisianni Siumup siulersuisuisa Aleqa Hammondip Folketingimut innersuussinerat qisuariaateqarfigerusuppara.

Qanorluunniit isummersinnaatitaanera atorlugu isummerpunga. Isumaqarpungami aaqqissuussaaneq iluarsaqqinneqartariaqartoq.

Aap, pineqaatissinneqarnikuunngilaq. Kikkulluunniit qineqqusaarsinnaapput aamma inuit qinerusutatik qinertarpaat. Kisianni Siumup siulersuisuinut apererusuppunga, siulersuisuni amerlanerussuteqartut isumaat tusaaneqarsinanersoq?

Ilaasortaagaluarlunga immikkut ataatsimiittoqarnissaanik aggersarneqanngilanga, taamaattumillu isummersueqataasinnaananga.

Ingerlariaqqittoqarnissaanut kikkut tamarmik periarfissinneqartariaqaraluartut, isumaqarpunga aalajangiineq siusippallaartoq.

Taamaattumik isumaqarpunga ajunnginnerpaaq anguniarlugu Siumumi siulersuisut iliuuseqarsimasussaagaluartut. Nunatsinnummi aningaasaliisoqarnissaa pisariaqarpoq, pitsaasumik avammut takutitsilluartoqartussaagaluarpoq.

Aamma nunatta anguniagaat qimallugit namminiilivinnissaq siunnertarineqarpallaartoq isumaqarpunga. Tamanna politikkikkut isummerfigisassaarli.

Kisianni siulersuisut isumaat tusaaneqarpat, imaluunniit siulersuisuni qaffasissumi inissisimasut aalajangigaraat?

Karen Motzfeldt Facebookikkut allappoq.

Aleqa Hammondip Folketingimut qinigassanngortinnera pillugu Kim Kielsen oqaaseqarusunngitsoq, Siumup allaffissornikkut pisortaanerata Mikael Petersenip KNR-imut oqaatigaa.

Karen Motzfeldtip isummersornera soqutigineqarluarpoq inuppassuarnit atuarneqareerluni.