paarlaaneq
Naalakkersuisuni paarlaattoqarnera IA-mit isornartorsiorneqarpoq
Peqqissutsimut nunanillu avannarlernik suleqateqarnermut naalakkersuisup Siumumeersup Doris Jakobsenip Naalakkersuisunit sulinngiffeqarnissaa kiisalu Folketingimi ilaasortaaleqqinnissaa Inuit Ataqatigiinnit isornartorsiorneqarpoq
Nick Nielsen Siumup siulersuisuinit Folketingimi ilaasortaanera naammaginagu Folketingimi ilaasortaajunnaarsippaat marlunngormat.
Taamaasilluni Folketingimi ilaasortaasareersoq peqqissutsimut nunanillu avannarlernik suleqateqarnermut naalakkersuisoq Doris Jakobsen Folketingimut qinersisoqarnissaata tungaanut Folketingimi ilaasortaalerseqqinneqarpoq.
Taamatut paarlaasoqarnera Inuit Ataqatigiinnit isornartorsiuisoqarpoq. Inuit Ataqatigiinnit Siumup qinigaatitani qanoq inississanerai akuleruffigineqarusunngikkaluartoq taamaattoq oqaatigaat 'Naalakkersuisut innuttaasut akileraartartullu soqutigisai pinnguariinnalerpagit akulerutinngittoorsinnaanatik'.
Peqqinnissaqarfik aningaasalersorneqarnerpaaq
- Erseqqissumik oqaatigissavarput Peqqinnissaqarfik, Nunatsinni suliassaqarfittut annerpaamik aningaasalersugaasoq innuttaasunullu tamanut, illoqarfinniippata nunaqarfinniippataluunniit, toqqaannartumik attuumassuteqartoq, partii aalajangersimasoq ilumini ataqatigiissaarinerlunnera peqqutigiinnarlugu asuliinnaq Naalakkersuisumit Naalakkersuisumut milorujunneqarnera akuersaannginnatsigu, Inuit Ataqatigiinni ataqatigiissaarisutut siulittaasup tullia Juliane Henningsen tusagassiuutinut nalunaaruteqarpoq.
- Naalakkersuisoq akisussaasuusoq inuttut nalaataqarluni allatulluunniit peqquteqavissumik sulinngiffeqarallartussaasimappat paasisinnaasimassagaluarparput aaqqiissutaagallartumik iliuuseqassagaanni, uanili erseqqissumik nalunaarutigineqarpoq partiip aalajangersimasup soqutigisai piinnarlugit Naalakkersuinikkut pinnguartoqartoq, Henningsen oqarpoq.
Peqqinnissaqarfimmik sumiginnaaneq
Doris Jakobsenip Naalakkersuisutut sulinngiffeqarnerani peqqissutsimut tunngasut ilaqutariinnermut, naligiissitaanermut isumaginninnermullu naalakkersuisumit, Siumumeersumit Martha Lund Olsenimit akisussaaffigineqassapput, nunanik avannarlernik suleqateqarneq inuussutissarsiornermut, suliffeqarnermut, niuernermut nunanullu allanut naalakkersuisumit, aamma Siumumeersumit Vittus Qujaukitsumit akisussaaffigineqassallutik. Tamanna Naalakkersuisunut nalunaarutigineqarpoq.
Peqqissutsimut Naalakkersuisoqarfik pingaaruteqarmat, taamatut aalajangiineq Inuit Ataqatigiinnit isumaqatigineqanngilaq.
- Peqqinnissaqarfimmik sumiginnaanertut isigaarput ilaqutariinnermullu, naligiissitaanermut isumaginninnermullu suliassaqarfimmik tulleriiaarinermi pingaartitsinnginnertut isigalugu. Tamanna akuersaarneqarsinnaanngilaq, IA-mi politikkerimit oqaatigineqarpoq oqaatigalugulu 'Naalakkersuinikkut siuttuuneq partiimut pinnguarfiunngitsoq'.
Siumumi siulittaasoq kiisalu Naalakkersuisut siulittaasuat Kim Kielsen Sermitsiaq.AG-mit apersorneqarusunngilaq. Aaqqissuisoqarfimmit apeqqutigineqartut akerusunngilai, tusagassiuutitigut nalunaarutinik nassiusserusunnerulluni.
Folketingimut tulliani qinersisoqassaaq kingusinnerpaamik septembarip 14-ani.
Pituffik pillugu suliaq sooq Nick Nielsenip Folketingimi ilaasortaajunnaarneranut pissutaanersoq aviisimi AG-mi atuarneqarsinnaavoq. Aviisi ataani pisiarineqarsinnaavoq: