aalisarnermut inatsit
Naalakkersuisoqarfiup pisortaata tamat oqartussaaqataanerannik unioqqutitsisoqannginnerarpaa
Aalisarnermut Piniarnermullu Naalakkersuisoqarfiup piffissami matumani aalisarnermut inatsisissatut siunnersuummi, massakkut tusarniuutigineqartumi, paasissutissat pingaarutillit takutikkumanngilai. Inatsisissatut siunnersuutip suli naammassineqarsimannginnera nassuiaatigineqarpoq.
Naalakkersuisoqarfiup pisortaa tusagassiuutinut nalunaarummi Transparency Greenland'imi siulittaasoq, Anita Hoffer sakkortuumik isornartorsiopaa, taanna AG-mut isornartorsiuisimavoq Inatsisartuni ilaasortap Michael Rosingip siunnersuummi naatsorsuutinut allakkanik takunnissinnaatitaannginnera pillugu. Tamanna Rosingip paragraf 37 naapertorlugu piumasaqarsimangaluarpoq.
Tamat oqartussaaqataanngitsut
- Anita Hofferip taama oqarnerata takutiinnarpaa inatsisissamik piareersaanermut paasinnissimananilu sianigisaqanngitsoq, Jørgen Isak Olsen erseqqissaavoq.
Aamma atuaruk: Transparancy: Krusep isertuussiniarnera 'tupannartoq'
- Naalakkersuisut kissaatigivaat siunnersuummik naammassineqarsimasumik suliarilluagaasimasumillu tunniussissallutik, Inatsisartut paasissutissanik pisariaqartunik tunngaveqarlutik oqaluuserisaqarsinnaassammata. Siunnersuut Inatsisartunut suli tunniunneqarsimanngimmat kinaluunniit siunnersuummut allannguutissamik allagaqarsinnaavoq, pisortaaneq nassuiaavoq.
"Nalinginnaalluinnartoq"
Jørgen Isak Olsen erseqqissaavoq Naalakkersuisut kissaatigigaat siunnersuutip suliarineqarnerata tunuliaqutaanik, allagaatinik takunnissinnaatitaaneq tunngavigalugu, tunniussiniaratik. Tamanna nalinginnaalluinnarpoq, inatsisartut pisortat ingerlatsinerat pillugu paasitinneqarsinnaatitaaneq pillugu Inatsisartut inatsisaanni allassimalluni, naalakkersuisoqarfimmi pisortap tusagaasiuutinut nalunaarutaani allassimavoq.
Aalisarnermut inatsisissatut siunnersuut sukumiisumik Naalakkersuisut inatsisilerisarfianni Inatsisartullu inatsisilersarfianni aamma misissorneqarpoq. Inatsisissatut siunnersuutit tamarmik taakkunani sukumiisumik misissorneqaqqaartarput. Inatsisissamik sukumiisumik misissuinerup qulakkeertarpaa inatsisissatut siunnersuutigineqartoq inatsisitut piumasaqaatigineqartut naammassisimanissaat aamma aningaasatigut kinguneriumaagassai ilaatigut aamma qulakkeerniarneqartarlutik, Jørgen Isak Olsen nassuiaavoq.
- Naggataatigut paatsuisumik saqqummiussineq pisariaqavissortumik erseqqissaavigineqartariaqarpoq, oqaatigineqarmat siunnersuut akuerineqariaqarpat raajarniarnissamut piffissaligaanngitsumik akuersissutit atorunnaarsinneqassasut.
- Tamanna ilumuunngilaq. Aalisarnermut inatsisissatut siunnersuut akuerineqarpat raajarniarnissamut piffissaligaanngitsumik akuersissutit atorunnaarsinneqassanngillat, Jørgen Isak Olsen erseqqissaavoq.
Piffissaliussaq
Naatsorsuutigineqarpoq aalisarnermut inatsisissatut siunnersuut naammassereersimasoq Inatsisartunut novembarip 8-anni tunniunneqassasoq. Inatsisissatut siunnersuut Inatsisartut novembarip 16-ianni siullermeerlugu oqaluuserissavaat.