Svend Hardenberg
Naalakkersuisoqarfiup pisortaa Svend Hardenberg atorfimminit tunuartinneqarallarpoq
Naalakkersuisut Siulittaasuata Nalaakkersuisoqarfiani Naalakkersuisoqarfiup pisortaa Svend Hardenberg atorfimminit tunuartinneqarallarpoq, tamanna Naalakkersuisut siulittaasuata ilisimatitsissutigaa
(Allaaserineqartoq nalunaaqutaq 18.11 nutarterneqarpoq)
Naalakkersuisut siulittaasuata Naalakkersuisoqarfiani pisortamut Svend Hardenbergimut kinguneqartitsisoqarpoq.
Naalakkersuisut siulittaasuat Kim Kielsen Siumumeersoq tusagassiuutinut nalunaarummi naatsumik allappoq Naalakkersuisut Siulittaasuata Nalaakkersuisoqarfiani Naalakkersuisoqarfiup pisortaa Svend Hardenberg ullumikkumiit marlunngornermit atorfimminit tunuartinneqarallarpoq.
Kielsen: Annertunerusumik oqaaseqarsinnaanngilanga
- Ilutigalugu aalajangerneqarpoq Søren Hald Møller Naalakkersuisut Siulittaasuata Naalakkersuisoqarfiani pisortaagallartussatut atorfinitsinneqassasoq. Søren Hald Møller massakkut Aatsitassanut tunngatillugu Avatangiisinut Aqutsisoqarfimmi pisortatut atorfeqarpoq 2014-imiilli Pinngortitamut, Avatangiisinut Inatsisinillu Atuutsitsinermut Naalakkersuisoqarfimmi pisortatut atorfeqarsimalluni, Naalakkersuisut siulittaasuat allappoq kiisalu allallugu 'suliaq inunnut ataasiakkaanut tunngassuteqarmat, Naalakkersuisut Siulittaasuata Naalakkersuisoqarfia annertunerusumik oqaaseqarsinnaanngitsoq'.
Pinngortitamut, Avatangiisinut Inatsisinillu Atuutsitsinermut Naalakkersuisoqarfimmi immikkoortortaqarfimmi pisortaq Mette Skarregaard Pedersen Naalakkersuisoqarfimmi pisortaagallartussatut toqqarneqarpoq.
Kim Kielsen nassuiaasariaqalerpa?
Naalakkersuisut siulittaasuata Kim Kielsenip oqaatigaa Svend Hardenberg 'atorfimminit tunuartinneqarallartoq'. Taamatut oqaaseqarnera pissutaalluni Kim Kielsen nassuiaateqartariaqalissaaq. Naalakkersuisuisut siulittaasuata Naalakkersuisoqarfianimi pisortaasoq illersortuaraluarpaa naak Inuit Ataqatigiinnit isornartorsiuisoqaraluartoq.
Kim Kielsenip Sermitsiaq.AG-mut tallimanngormat nassuiaatigaa, Svend Hardenbergip folketingimi ilaasortaasimasumut Nick Nielsenimut naqqiissuteqarnissaanik piumasaqaatitalimmik mailimik januaarip 21-ani nassiussaa, piumasarisimallugu.
- Mailimik nassiussinissara piffissaqarfiginnginnakku Svend Hardenberg piumaffigaara maili nassiutissagaa, oqallinnermi malinnaaffigaara oqallisigineqarmat (Pituffimmi kiffartuussinissamut isumaqatigiissutip Folketingimi oqallisigineqarnerani) .Nalunngilara atorfilittaasoq politikkerip naqqiinissaanut piumasaqarsinnaanngitsoq. Atorfilittat politikkikkut attuumassuteqartussaanngillat - qinikkanuku politikkimut akuusussat.
Aamma:
- Arlaannik isertuussinianngitsunga naqissuserusuppara. Isertuussinianngilanga, Kim Kielsen oqarpoq.
AG-mi sapaatip akunnerani matumani allaaserineqartut atuarneqarsinnaapput 'Immikkut ilisimasalik: Nick Nielsenimik soraarsitsineq pissaanermik atornerluinermut assinguvoq', 'Nickip soraarsitaaneranut pissutaasoq ilumoortoq: Hardenbergip isertukkamik naalakkiuteqarneranik kalerriuteqarsimanini pillugu peersitaasoq' kiisalu Pituffimmi kiffartuussinermut isumaqatigiissutip annaaneqarneranut tunngassuteqartut allat. AG ataani pisiariuk: