Naalakkersuisoqarfiup amigartoornerusinnaaneq akerlilerpaa

Nunatsinni partiit arfiniliusuni sisamat nunatta aningaasaqarnera ukiunut tulliuttunut ernumanarluinnartutut inissittutut nalilerpaat 2014-imut 275 million koruuninik amigartooruteqartoqarnissaanut ilimasaarutigineqareersorlu. Kisianni Partii Naleqqap aamma Partii Inuit suli annerusumik amigartoorsinnaaneq aarleqqutigaat.

- Ilungersunartorujussuartut tiguarput. Kingunissai imaanngitsorujussuusaapput, Partii Naleraqqap siulittaasua Hans Enoksen, 275 million koruuninik 2014-imut amigaartooruteqartoqarnissaa ilisimasaarutigineqareersorlu, taama oqarpoq.

Tapiissutit qulingat ernumatitsivoq
Kisianni Hans Enoksenip 2014-imi suli annerusumik amigartoorsinnaaneq ernummatigaa. Tassami Aningaasaqarnermut Nunamullu Namminermut Naalakkersuisoqarfiup saqqummiussaani ‘Missingersuutinik malittarinninneq September 2014’ novembarip 17-ani suliarineqartumi immikkoortoq 2.4-mi Isertitatut aningaasaliissutit pillugit qulequttami ima allassimasoqarpoq:

‘Septembarip qaammataata naanerani katillugit 4.838 mio. kr.-it isertitat tiguneqarsimapput, tassa 2014-mut aningaasanut inatsiseqarfiusumi isertitassatut missingersuutigineqartunut tamarmiusunut 6.856 mio. kr.-iusut 70,6 %-ii. Tassunga atatillugu malugeqquneqarpoq septembarip qaammataata naanerani naalagaaffiup ataatsimoortumik tapiissutaanit aqqaneq marluusunit qulit tiguneqareersimammata. 2014-mi qaammammut 303,5 mio. kr.-it tiguneqartarput.

Taamaalilluni isertitat pillugit assiliaq tamarmiusoq 2014-mi ukiumi aningaasanut inatsiseqarfiusumi assut nikallunganarpoq.’

Atuaruk: Amigartoorujussuarneq: Aningaasaqarneq taamaammat taama inissisimavoq

Taamaammat ernummapput
Taamaattumik Partii Naleqqap 2014-imut ukiup naanerani amigartooruteqarnerusinnaaneq ernummatigineqarpoq.

- Taakkua 275 million koruunit qaammatinut qulingiluanut amigartoorutaassasut allaqqavoq. Kisianni pappilissani tassani allaqqavoq 303 million koruunit tiguneqareersimasut. Tassa karsi imaqartinniarlugu, Hans Enoksen oqarpoq, nangillunilu:

- Ernumavunga. Sulilu ukiut tulliinut ernumaneruvunga. Karsi immerniartariaqarpoq. Naalakkersuisunngortussat atorsarlutik sulisussanngorput. Inuit aamma kommuunit tamanna misigissavaat.

Atuaruk: Paasissutissanik isertuussiniartoqarsimanngitsoq Qujaukitsup oqaatigaa

Partii Inuit amigartoornerunissaq aamma ernumagaat
Partii Inuini politikerit aamma 275 million koruuninit annerusumik amigartoorsinnaaneq ernummatigineqarpoq.

- Ilimagaarput amigartoorutissat suli naatsorsuutigisanit annerusussasut. Takusinnaavarpummi naalagaaffiup tapiissutigisartagaanit tigusisoqareersimasoq, Partii Inuit siulittaasuat Nikku Olsen oqarpoq.

- Soorunami Naalakkersuisunngortussat pilluakataaratik sulisussanngorput. Aningaasaqarnikkut sukannersumik ingerlatsisussanngorput Naalakkersuisunngortussat, taannalu sulinissaannut ilungersunartorsiortitsisunngortussaavoq, Nikku Olsen oqarpoq.

Atuaruk: Aningaasanik amigartoorujussuarnissaq Olsvigimit isornartorsiorneqarpoq

Demokraatit: Paasissutissanik isertuussiniarsarisimapput
- Ernumanartorujussuuvoq. Aningaasaqarnerput taama ilungersunareertigisoq Inatsisartunngortussat ilungersunartumik nangitassinneqartussanngorput. Aningaasaqarnerput nanertungaareertigisoq aamma nanertoqqinneqartussanngormat ernumanartorujussuuvoq, Demokraatit siulittaasuat Anda Uldum oqarpoq.

Anda Uldummip aamma tupigusuutigaa Naalakkersuisut novembarip 17-anili pissutsit ilisimalersimagunikkit sooq avammut saqqummiussimannginneraat.

- Isertuussiniarsarisimasutut nalilertariaqarput, oqarpoq.

Atuaruk: GA: Missingersuutit malillugit ingerlasoqarpa, Vittus?

IA: Naalakkersuinerlunneq amigartoortitsivoq
Inuit Ataqatigiilli isumaqarput naalakkersuinerlunneq amigartoornermut pissutaasoq.

- Ajoraluartumik taamatut inissippugut Naalakkersuinerlunneq pissutigalugu, Inuit Ataqatigiit siulittaasuat Sara Olsvig oqarpoq, nangillunilu:

- Siorna aningaasaqarnermut Inatsisissaq suliarineqarmat oqarpugut taakkoqqissaat massakkut amigartooruteqarfigineqartut amigartooruteqarfigineqassasut. Siorna oqaaseqatitsinni oqarpugut makrelit amigartooruteqarsinnaasut 100.000 tonsit ilisimaneqanngimmat ilumut aalisarneqassanersut, Sara Olsvig oqarpoq.

- Taamanili aningaasaqarnermut Inatsit suliarineqarmat tukappoq. Allaat ulloq taanna aningaasanut inatsit akuersissutigineqalermat kisitsisit allanngorput, Sara Olsvig taama eqqaasitsivoq.

Naalakkersuisoqarfiup amigartoornerusinnaaneq akerlilerpaa
Kisianni Aningaasaqarnermut Nunamullu Namminermut Naalakkersuisoqarfiup nunatta Partii Inuit Partii Naleqqallu ernummatigaattut amigartoornerusinnaanera akerlilerpaat.

- Taakkua 275 million koruunit allaanerulernavianngillat qaammammut ataatsimut nalaagaaffimmit tapiissutit siumoortumik tiguneqarpata, Peter Hansen Aningaasaqarnermut Nunamullu Namminermut Naalakkersuisoqarfiup pisortagarillagaa oqarpoq, nangillunilu:

- Naalakkersuisut siumoortumik tapiissutinik tigusinngillat. Tapiissutit piffissaliunneqartut malillugit tunniunneqartarput, soorlu 2014-imut aningaasaqarnermut inatsimmi tamanna allassimasoq. Amigartoorneq annerulernavianngilaq tapiissutit ukiumut 12-nngorlugit aggulunnerini qulit tunniunneqareersimammata. Tamanna 2014-mut naatsorsuutini ilanngunneqarsimavoq, missingersuutinillu malittarinninnermut nassuiaammi 2014-imut nassuiarneqarluni.