Pisortanngortut
Naalakkersuisoqarfinni pisortaalersussat marluk ukuupput
Aningaasaqarnermut naalakkersuisoqarfimmi aamma ilaqutariinnermut, naligiissaarinermut isumaginninnermullu naalakkersuisoqarfimmi nutaanik pisortaqalerpoq
Nikolai Sten Christensen aningaasaqarnermut naalakkersuisoqarfimmi pisortanngorpoq, kiisalu Julie Præst Wilche ilaqutariinnermut, naligiissaarinermut isumaginninnermullu naalakkersuisoqarfimmi pisortanngorluni.
Namminersorlutik Oqartussat nalunaaruteqarpoq.
Misilittagaqarluartoq
Aningaasaqarnermut Naalakkersuisoqarfimmi pisortanngortoq Nikolai Sten Christensen suliat tungaasigut ilaatigut Nunatsinni pisortani atorfeqarsimavoq, tassunga ilanngullugit Peqqinnissaqarfik aamma Inatsisartut Allattoqarfiat. Nikolai Sten Christensen Inatsisartut Allattoqarfiannit allattoqarfiup pisortaatut atorfeqarsimavoq.
- Nikolai Sten Christensenip Inatsisartuni sulinermi ilisarisimalluakkama suleqatiginissaa qilanaaraara. Nikolai Sten Christensen sukumiisumik suleriaaseqarnermi saniatigut inuuvoq ilakkuminartoq, siammasissumik aqutsinermik politikkimillu ingerlatsinerup iluani minnerunngitsumillu Aningaasanut Inatsimmik aningaasaqarnermillu ingerlatsinermik politikkikkut akisussaaffimma qiterisaanik annertuumik ilisimasaqartoq, aningaasaqarnermut aatsitassarsiornermullu naalakkersuisoq, Demokraatinit Anda Uldum oqarpoq.
Nunatsinni ukiorpassuarni atorfeqartoq
Ilaqutariinnermut, Naligiissitaanermut Isumaginninnermullu Naalakkersuisoqarfimmi pisortanngortoq Julie Præst Wilche, Nunatsinni pisortani sivisuumik sulisimavoq, taakkununnga ilanngullugit Peqqinnissaqarfimmi pisortatut atorfiit arlallit kiisalu Namminersorlutik Oqartussat Qitiusumik Allaffeqarfianni atorfigisimallugit.
Julie Præst Wilche ukioq manna februaarip qaammataanili Ilaqutariinnermut, Naligiissitaanermut Isumaginninnermullu Naalakkersuisoqarfimmi naalakkersuisoqarfiup pisortaatut atorfeqarallarsimavoq.
- Julie Præst Wilchep ukiup affaata kingulliup ingerlanerani naalakkersuisoqarfinni aqutsinermik naammagisimaarnartumik ingerlatsisimanerminut ilutigitillugu Peqqissutsimik Naalakkersuisoqarfimmik aqutsinermik isumaginnissimasup suleqatiginissaa qilanaaraara. Manngaarissumik misilittagaqarnermi saniatigut Julie Præst Wilche aqutsinermi pitsaasorujussuarnik naalakkersuisoqarfiup aqunneqarneranut anguniakkanillu piviusunngortitsinissamut atatillugu atorneqarsinnaasunik piginnaasaqarpoq sulianillu pitsaasumik ataatsimut isiginnissinnaassuseqarluni, naalakkersuisoq Martha Lund Olsen, Siumut, oqarpoq.