tunuarneq

Naalakkersuisoqarfimmi pisortaq tunuartoq

Martha Lund Olsen (S) naalakkersuisoqarfimmi nutaamik pisortassarsiortariaqassaaq

Sapaatip-akunnerani kingullermi naalakkersuisooqatigiit pilersinneqarmata, ullumi atorfilittani annertuumik allannguuteqartoqarpoq.

Naalakkersuisoqarfimmi pisortaq Ólafur P. Nielsen kommuninut, nunaqarfinnut, isorliunerusunut, attaveqarnermut ineqarnermullu naalakkersuisoqarfimmi pisortaq atorfimminit tunuarpoq. Naalakkersuisut tusagassiuutinut nalunaarutaanni naatsumi tamanna atuarneqarsinnaavoq.

- Naalakkersuisut Siulittaasuata Naalakkersuisoqarfia Naalakkersuisoqarfimmilu pisortaq Ólafur P. Nielsen ulloq 2. november 2016 akunnerminni isumaqatigiissuteqarput Kommuninut, Nunaqarfinnut, Isorliunerusunut, Attaveqaqatigiinnermut Ineqarnermullu Naalakkersuisoqarfimmi pisortatut Ólafur P. Nielsen soraassasoq, tusagassiuutinut nalunaarummi allaqqavoq.

Tunngavilersorneqanngitsoq
Ólafur P. Nielsenip nammineq kissaateqarneranik imaluunniit soraarsitsisoqarsimanersoq maanna ilisimatitsisoqarsinnaanngilaq. Illuatungeriimmi oqaaseqarniaratik isumaqatigiissutigisimavaat.

- Illuatungeriit akunnerminni isumaqatigiissutigalugu pisussaaffilerput pisortaasimasup suliunnaarneranut tunngatillugu isumaqatigiissummut tunngasunik isumaqatigiissutillu imarisai pillugit tamanut ammasumik inummulluunniit allamut oqaaseqartoqassanngitsoq, tusagassiuutinut nalunaarummi tamanna atuarneqarsinnaavoq.

Kiffartuussinermut isumaqatigiissutit
Ólafur p. Nielsenip naalakkersuisoqarfik pisortaaffigisimasaa, sapaatip-akunnerini kingullerni angallannermi ilaasut pillugit kiffartuussinermut isumaqatigiissutit oqallisigineqarnerinut atatillugu ajornartorsiorfiungaatsiarpoq. Politikkikkut taassuma pisortaa, Knud Kristiansen (A) kiffartuussinermut isumaqatigiissutit suliarineri pillugit isornartorsiorneqangaatsiarpoq.

Naalakkersuisooqatigiinnik nutaanik pilersitsisoqarnerani Knud Kristiansenip atorfini annaavaa, Atassut ilisimaneqareersutut naalakkersuisooqatigiinniikkunnaarmat. Naalakkersuisoqarfik maanna isumaginninnermut naalakkersuisuusimasumit Martha Lund Olsenimit (S) akisussaaffigilerneqarpoq.

Powered by Labrador CMS