Naalakkersuisoqarfik

Naalakkersuisoqarfimmi pisortaq Svend Hardenberg atorfimminit soraarpoq

Naalakkersuisut siulittaasuata Naalakkersuisoqarfianit nalunaaruteqarpoq, Naalakkersuisoqarfimmi pisortaasoq Svend Hardenberg suliunnaartoq. Annertunerusumilli paasissutissanik saqqummiisoqanngilaq

Naalakkersuisut siulittaasuata Naalakkersuisoqarfiani pisortaasoq Svend Hardenberg artorfimminit tunuarpoq.

Hardenbergip suliunnaarneranut atatillugu Naalakkersuisoqarfimmit annertunerusumik paasissutissiisoqanngilaq. Svend Hardenbergilli atorfimminit suliunnaarsinneqarpoq pisuni assigiinngitsuni isornartorsiorneqareernermi kingorna.

Naalakkersuisut siulittaasuata Naalakkersuisoqarfiani pisortaanertut tunuartinneqarallarpoq februaarip 24-ani.

Paasissutissiisoqanngilaq
- Naalakkersuisut Siulittaasuata Naalakkersuisoqarfiata aamma naalakkersuisoqarfimmi pisortap Svend Hardenbergip 13. marts 2015 isumaqatigiissutigaat Svend Hardenberg atorfimminit illua’tungeriit isumaqatigiinnerisigut martsip naanerani 2015-imi soraassasoq, Naalakkersuisut siulittaasuata Naalakkersuisoqarfiani pisortaagallartoq Søren Hald Møller ilisimatitsivoq.

Tamanna Namminersorlutik Oqartussani kommunenilu allaffissornikkut pisortat aningaasarsiaat atugaasalu pillugit Naalakkersuisut aamma Danmarks Jurist- og Økonomforbundip isumaqatigiissutaat 16. december 2013-imeersoq naapertorlugu isumaqatigiissutigineqarpoq.

- Isumaqatigiissut imarisaalu pillugit tamanut inunnulluunniit ataasiakkaanut oqaaseqartoqassanngitsoq illua’tungeriinnit isumaqatigiissutigineqarpoq, tusagassiutinut nalunaarummi Søren Hald Møller ilisimatitsivoq.

Pisortaasut soraarsinneqarnerat
Ilaqutariinnermut Naligiissitaanermut Isumaginninnermullu Naalakkersuisoqarfimmi pisortatut Susie Marthin Kjeldsen tunuartoq Sermitsiaq.AG-mit marsip sisamaani allaaserineqarpoq. Qaammatinut 18-inut naapertuuttunik utoqqalinersiassat ilanngullugit tunuareernerminit aningaasarsiaqartinneqassasoq allaaserineqarpoq.

Ilaqutariinnermut, naligiissitaanermut, isumaginninnermullu naalakkersuisoq Martha Lund Olsen, Siumut, aamma Naalakkersuisoqarfimmi pisortaasoq Susie Marthin Kjeldsen akornanni susoqarsimanersoq apeqqutaaginnalerpoq.

Assinganik aamma Naalakkersuisut siulittaasuata Kim Kielsenip aamma Naalakkersuisoqarfimmi pisortaasup Svend Hardenbergip akornanni susoqarsimanersoq aamma apeqqutaaginnalerpoq.

Svend Hardenberg Naalakkersuisunut siulittaasuusimasumit Aleqa Hammondimit Siumumeersumit atorfinitsinneqarpoq. Taanna maajimi 2013-mi pivoq.

Svend Hardenbergip Naalakkersuisoqarfimmi pisortaajunnaarneranut tunngatillugu Kim Kielsen oqaaseqarusunngilaq.

Hardenbergip soraarneranut atatillugu qanoq aningaasarsiaqartinneqassanersoq Sermitsiaq.AG-mit misissorneqarpoq

Powered by Labrador CMS