Naalakkersuisoqarfimmi pisortaasup suliunnaarnera IA-mit ernumagineqarpoq

Naalakkersuisoqarfinni pisortaasut sivisuumik atorfimminni sulineq ajortut ilisimaneqarpoq.

Inuit Ataqatigiinnit tusarneqarpoq Ilaqutariinnermut Naalakkersuisoqarfimmi pisortaq erngertumik suliunnaarsimasoq. Taamatut pisoqarnera Inuit Ataqatigiinnit ernumagineqarpoq, taamaammat Inatsisartuni ilaasortaq Inuit Ataqatigiinnit Agathe Fontain paragraf 37 naapertorlugu Naalakkersuisunut apeqquteqarpoq.

- Tusakkat tunngavigalugit Ilaqutariinnermut Naalakkersuisoqarfimmi pisortaq erngertumik suliunnaarsimavoq. Nalunaarutigineqarporlu maanna Peqqissutsimut Naalakkersuisoqarfiup pisortarigallagaa aamma Ilaqutariinnermut Naalakkersuisoqarfimmik isumaginnikkallartuussasoq. Tamannali pillugu Naalakkersuisut avammut ilisimatitsisimanngillat, paragraf 37 naapertorlugu apeqquteqaamminut Agathe Fontain tunngaviliivoq.

Peqqissutsimut Naalakkersuisoqarfik artukkerneqartoq
IA-mi politikkerip oqaatigaa Doris Jakobsenip Siumumeersup Folketingimi ilaasortanngoqqinnerata pissutigisaanik Peqqissutsimut Naalakkersuisoqarfik artukkerneqartoq. Doris Jakobsen peqqissutsimut naalakkersuisuugaluarpoq, Folketingimilu ilaasortanngoqqinnini pissutigalugu Naalakkersuisunit sulinngiffeqarluni. Sulinngiffeqarnera Inuit Ataqatigiinnit 'eqqumiigineqarpoq'.

- Tamatuma saniatigut Peqqissutsimut Naalakkersuisoqarfimmi pisortaq, aamma Ilaqutariinnermut Naalakkersuisoqarfimmik isumaginnittussatut qaavatigut piumasaqarfigissallugu ingasappoq. Naalakkersuisoqarfiit taakkua marluk katillugit 2 milliardinik missingersuuteqarput, taamaattumillu erseqqissumik paasisaqarusuppunga, Agathe Fontain oqarpoq.

Paragraf 37 naapertorlugu Naalakkersuisunut ima apeqquteqarpoq:

• Ilaqutariinnermut Naalakkersuisoqarfimmi pisortap suliunnaarsimanera aamma/imaluunniit soraarsitaasimanera Naalakkersuisut uppernarsarsinnaavaat?
• Taamaattoqarsimappat suliunnaarnerup aamma/imaluunniit soraarsitaasimanerup Nuna aningaasivianut aningaasatigut kinguneri pillugit Naalakkersuisut qanoq paasissutissiisinnaappat?
• Ilaqutariinnermut Naalakkersuisuni pisortaagallartussap Peqqissutsimut Naalakkersuisoqarfimmik tapullugu isumaginnittussaanera eqqarsaatigalu suliunnaarnerup maanna pinera Naalakkersuisunit tulluartuutinneqarpa?
• Pisoq pillugu Naalakkersuisut avammut nalunaaruteqarsimannginnerannut suna patsisaava?
• Ilaqutariinnermut aamma Peqqissutsimut Naalakkersuisoqarfiit kattutitinnissaannut Naalakkersuisut eqqarsaatersuuteqarnerat soraarsitsinermut patsisaanerpa?
• Naalakkersuisut pisamut tunngatillugu Inatsisartuni innuttaasulluunniit akornanni naliliinissamut pingaaruteqartunik allanik paasissutissaateqarpat?