Naalakkersuisoqarfik
Naalakkersuisoqarfimmi pisortaagallartussamik toqqaasoqaqqittoq
Julie Præst Wilche nutaamik suliffittaarnera pissutigalugu Peqqissutsimut Naalakkersuisoqarfimmi nutaamik pisortaagallartussamik toqqaasoqarpoq
Peqqissutsimut naalakkersuisoq Doris Jakobsen, Siumut, aalajangerpoq Lone Nukaaraq Møller Peqqissutsimut Naalakkersuisoqarfimmi aggustip 24-t aallarnerfigalugu pisortaagallartunngortinniarlugu Peqqissutsimut Naalakkersuisoqarfimmi pisortamik atorfinitsitsoqarnissaata tungaanut.
Tamanna Namminersorlutik Oqartussanit nalunaarutigineqarpoq.
Lone Nukaaraq Møller Aningaasaqarnermut Naalakkersuisoqarfimmi immikkoortortamut pisortatut atorfeqarluni Peqqissutsimut Naalakkersuisoqarfimmi pisortaagallalissaaq. Kalaallit Nunaanni meeqqat pisinnaatitaaffii pillugit sullissiviup MIO-p allattoqarfiani pisortatut aamma pinaveersaartitsinerup ilisimatusarnerullu iluani siornatigut ilaatigut atorfeqarsimavoq.
Peqqissutsimut Naalakkersuisoqarfimmi pisortatut atorfik piffissami qanittumi inuttassarsiorneqalissasoq Naalakkersuisoqarfimmit nalunaarutigineqarpoq.
Suliffiit marluk
Julie Præst Wilche Ilaqutariinnermut Naalakkersuisoqarfimmi Peqqissutsimullu Naalakkersuisoqarfimmi pisortaagallartutut atorfeqaraluarpoq. Ilaqutariinnermut Naalakkersuisoqarfimmi pisortatut atorfinitsinneqaqqammerpoq.