Naalakkersuisoqarfik
Naalakkersuisoqarfimmi pisortaagallartoq: Qanoq suleriuseqarnersunga Kim Kielsenip nalunngilaa
Søren Hald Møller Naalakkersuisut siulittaasuata Naalakkersuisoqarfiani pisortaagallartutut pingasunngormat suleqqaarpoq. Naalakkersuisut siulittaasuat aamma suleqatigeqqammerpaa
Namminersorlutik Oqartussat allaffeqarfiata qullasinnerpaartaani Nuuk Centerimi Søren Hald Møller pingasunngormat suliartorpoq.
Tassami Naalakkersuisut siulittaasuat Kim Kielsen Siumumeersoq tusagassiuutinut nalunaarummi naatsumik marlunngormat allappoq Naalakkersuisut Siulittaasuata Nalaakkersuisoqarfiani Naalakkersuisoqarfiup pisortaa Svend Hardenberg atorfimminit tunuartinneqarallarpoq - tunuartitaagallarnera suli atuuppoq.
Søren Hald Møller Naalakkersuisut siulittaasuata Naalakkersuisoqarfiani pisortaagallartussatut atorfinitsinneqareernermi kingorna pingasunngormat suliartorpoq.
- Søren Hald Møller, Naalakkersusiut siulittaasuata Naalakkersuisoqarfiata isigineqarnerata pitsaavallaartuunnginnera qanoq iluarsiniarpiuk?
- Naalakkersuisoqarfimmi pisortaagallartussatut atorfeqarnissanni toqqaannartumik qanoq tamanna iliuuseqarfigissallugu oqaatigisinnaanngikkallarpara. Naalakkersuisut siulittaasuata Naalakkersuisoqarfiani pisortatut suliassaasut nuannaarutigalugit suliarissavakka atorfeqarallarninni, Sermitsiaq.AG-mut oqarpoq.
Ilisarisimasut
- Naalakkersuisut siulittaasuata nalunngilaa qanoq suleriuseqarnersunga. Avatangiisinut Pinngortitalerinermullu Naalakkersuisoqarfimmi suleqatigiittareerpugut. Atorfimmi ilisimasaqarluartuuvunga, sivisuumimmi taamatut atorfeqarpunga, 55-nik ukiulik Søren Hald Møller oqarpoq. Atorfinititsinermut tunngasut oqaaseqarfigisinnaanngilai, tassungami akisussaassuunngilaq.
Aatsitassanik Suliassaqarfinnut Avatangiisinut Aqutsisoqarfimmi Søren Hald Møller atorfeqartareerpoq. Pinngortitamut, Avatangiisinut Inatsisinillu Atuutsitsinermut Naalakkersuisoqarfimmi Naalakkersuisoqarfimmi pisortatut maajimi 2014-mit atorfeqarpoq. Namminersornerullutik Oqartussani/Namminersorlutik Oqartussanilu katillugit ukiuni 18-ni atorfeqarpoq. Naalakkersuisut siulittaasuat. Naalakkersuisut siulittaasuanut allatsitut atorfeqartareerpoq siornatigut ukiuni arfinilinni.
Naalakkersuisut siulittaasuata Kim Kielsenip oqaatigaa Svend Hardenberg 'atorfimminit tunuartinneqarallartoq'. Taamatut oqaaseqarnera pissutaalluni Kim Kielsen nassuiaateqartariaqalissaaq. Taamaammat nassuiaassutigineqanngilaq sooq Svend Hardenberg atorfimminit tunuartinneqarallarnersoq.