Naalakkersuisoqarfik suliffeqarfimmik politiinut suliassanngortitsisoq

Peqqissutsimut Naalakkersuisoqarfik suliffeqarfiup imigassamut inatsit malissimannginnerarlugu politiinut suliassanngortippaa. Suliaq maanna politiinit nalilersuiffigineqassaaq.

Imigassamut inatsit nutaaq akerleriissutaaqisoq 1. martsimi eqqunneqarpoq taasumalu malinneqarnissaa Peqqissutsimut Naalakkersuisoqarfiup pisussaaffigaa, maannamullu nakkutilliisimanerit aallaavigalugit politiinut suliassanngortitsoqarpoq.

Kinaanersoq oqaatigineqarsunngitsoq

- Suliat nakkutilliinermit oqartussat suliffeqarfiullu pineqartup akornanniinnerat pissutigalugu Peqqissutsimut Ilisimatusarnermullu Naalakkersuisoqarfik suliat ataasiakkaat oqaaseqarfigisinnaanngilai, Naalakkersuisoqarfiup Sermitsiaq.AG-mut akissuteqaani allassimavoq.

Kommuneqarfik Sermersuumilu ataatsimiitaliap ataatsimiinnerani allassimavoq, naalakkersuisoqarfiup Vinslottet nittartakkatigut neqerooruteqartarnera pissutigalugu politiinut suliassanngortinneqarnissaa inassutigineqarsimasoq.

Tusagaqarsimanngitsoq

Vinslottet pineqarnersoq uppernarsarneqarsinnaanngikkallarpoq, tamatumunnga pissutaavoq piginnittoq Martin Sandy Shalmi politiinit saaffiginnissummik tigusaqarsimannginnera.

- Ilisimavara Naalakkersuisoqarfiup Vinslottet politiinut suliassanngortinniaraa, taamaattoq uanga politiinit tusaqarsimanngilanga, Martin Sandy Shalmi Sermitsiaq.AG-mut paasissutissiivoq.

Naalakkersuisoqarfiup paasissutissiaraa, arlaleriarluni nakkutilliisarsimalluni, tassani suliffeqarfiit ataasiakkaat inatsimmut nutaamut atatillugu paatsuisimanerinik pissutsinillu aaqqiissuteqarnissaat pillugu oqaloqatigineqartarsimallutik.

Kommunit akuliutsinneqartut

- Nakkutilliinerit tunngavigalugit nalunaarusiortoqarsimavoq taakku kommunalbestyrelsinut nassiunneqareersimanngikkunik nassiunneqartussaapput. Kommunalbestyrelsinut nassiussisarneq inatsimmut atatillugu aalajangiisussatut piginnaatitaaffeqarnerat ataanilu imigassamik tuniniaanissamut akuersissutit tunniunneqarnerinut atatillugu piumasaqaasersuisussaanerannik pissuteqarpoq, naalakkersuisoqarfik nassuiaavoq.

- Nakkutilliinerit ataatsimut isigalugit pitsaasumik ingerlanneqarsimapput nakkutilliisullu akuersissutaateqartunit tigulluarneqarsimasut, Peqqissutsimut Naalakkersuisoqarfik paasissutissiivoq.

Powered by Labrador CMS